Македонија ги привршува подготовките за настап на XX Медитерански игри, кои од 21 август до 3 септември ќе се одржат во италијанскиот град Таранто. Македонската делегација оваа година ќе биде најбројна досега, со околу 130 учесници кои ќе се натпреваруваат во 19 различни спортови.

Со ова учество, земјата бележи историски исчекор во своето присуство на едно од најзначајните мултиспортски натпреварувања во медитеранскиот регион, каде ќе настапат спортисти од повеќе земји.

Посебно внимание привлекува настапот во четири екипни спортови. Боите на Македонија ќе ги бранат женската одбојкарска и женската ракометна репрезентација, како и машката фудбалска репрезентација и машката селекција во баскет 3х3.

Во изминатиот период спортистите ги реализираат завршните подготовки заедно со своите тренери и стручни тимови, со цел да ја достигнат најдобрата форма пред почетокот на натпреварувањата.

Од Македонскиот олимписки комитет посочуваат дека Медитеранските игри претставуваат можност за афирмација на македонскиот спорт, стекнување меѓународно искуство и постигнување значајни резултати на силна спортска конкуренција.

Во периодот до почетокот на Игрите, јавноста ќе биде редовно информирана за составот на делегацијата, распоредот на настапите и резултатите на македонските спортисти преку официјалните канали на Македонскиот олимписки комитет.