Терапијата со медицински канабис под постојан лекарски надзор доведува до значајно намалување на болката, несоницата и проблемите со расположението кај постарите возрасни лица. Ова го покажува опсервациската студија објавена на платформата „Рисрч сквер“ (Research Square), спроведена врз пациенти на просечна возраст од 74 години. Кај повеќе од 90 отсто од испитаниците со тримесечно следење е забележано мерливо подобрување на главниот симптом.
Истражувањето опфати 124 лица на возраст од 65 до 104 години од специјализирана ординација во Колумбија, третирани со стандардизирани канабис производи во периодот меѓу јануари 2024 и септември 2025 година. Научниот тим беше предводен од експерти од Универзитетот Комплутенсе во Мадрид, медицинската групација „Куратива“ и здружението АУПАК (AUPAC).
Кај 44 пациенти со клиничко следење од најмалку три месеци, аналитичарите евидентираа премин на симптомите од умерени во благи. Од 42 пациенти со целосни мерливи податоци, 38 односно 90,5 отсто забележале намалување за барем еден поен на скалата за интензитет на главниот здравствен проблем. Ниту еден од следените пациенти не пријавил влошување на состојбата.
Клинички ефективните дози останаа под пет милиграми дневно за секој испитуван канабиноид, вклучително ТХЦ (THC) и ЦБД (CBD). Авторите посочуваат дека ваквите наоди директно го потврдуваат основниот геријатриски принцип во фармакологијата: третманот кај постарата популација секогаш треба да почне со ниски дози и постепено да се прилагодува.
Податоците за безбедност опфатија 80 пациенти. Околу една третина развиле несакани ефекти, најчесто поспаност и вртоглавица, но сите реакции биле оценети како благи или умерени. За време на надзорот не се регистрирани сериозни компликации поврзани со третманот, падови или болнички хоспитализации.
Покрај подобрениот квалитет на сон и намалената хронична болка, 11 пациенти успеале целосно да ги прекинат или значително да ги намалат претходно препишаните конвенционални лекови. Меѓу редуцираните медикаменти се наоѓаат бензодијазепини, опиоидни аналгетици и нестероидни антиинфламаторни лекови.
Истражувачкиот тим заклучува дека контролираната употреба на канабис може да претставува валидна терапевтска опција кај повозрасната популација, но истовремено повикува на поголеми проспективни истражувања во повеќе медицински центри.
