Извршниот директор на „Спејс-икс“, Илон Маск, ја обвини украинската војска дека го користела сателитскиот интернет-систем „Старлинк“ за офанзивни напади со беспилотни летала, што, според него, претставува прекршување на условите за користење на услугата.

„Украинската војска ги прекрши условите за користење на ’Старлинк‘ и го употреби системот за офанзивни напади со беспилотни летала, со цел убивање луѓе. Таа правна дупка беше затворена минатата недела“, напиша Маск на социјалната мрежа „Икс“.

Тој додаде дека „Старлинк“ е наменет исклучиво за одбранбени операции.

Маск, исто така, оцени дека оневозможувањето на системот би довело до моментален колапс на украинската линија на фронтот.

„Ова не е закана, туку едноставно факт“, напиша тој.

Истовремено, Маск тврдеше дека „Спејс-икс“ преку своите активности придонела повеќе за одбраната на Украина од која било друга приватна компанија во светот.

Изјавите на Маск повторно го отвораат прашањето за улогата на приватните технолошки компании во војната во Украина и за зависноста на воените комуникации од комерцијалната сателитска инфраструктура.