Дел од најблиските соработници на американскиот претседател Доналд Трамп сè почесто го гледаат Марко Рубио како сериозен кандидат за претседателските избори во 2028 година, пишува „Политико“. Неговото позиционирање се поврзува со улогата во надворешната политика, лојалноста кон Трамп и способноста да избегне внатрепартиски политички замки.
За Рубио ова претставува голем пресврт. Некогаш беше гледан како политичар премногу близок до републиканскиот естаблишмент, со изразено тврд надворешнополитички пристап и со товарот на неуспешната претседателска кампања од 2016 година.
Неговата работа во политиката кон Венецуела, како и оданоста кон Трамп, му го зголемиле угледот во Западното крило на Белата куќа и кај дел од гласачите на движењето МАГА.
Рубио претходно изјави дека не би се кандидирал против потпретседателот Џеј Ди Венс за републиканската номинација. Сепак, сè поголем број негови поддржувачи во кругот на Трамп сега го претставуваат неговото подоцнежно прифаќање на трампизмот како предност.
„Џеј Ди Венс е фантастичен потпретседател, а Марко Рубио е одличен државен секретар“, изјави советникот на Трамп, Алекс Брусевиц.
Тој додаде дека по кампањата во 2016 година Рубио можел да тргне по два различни патишта. Според него, наместо да се дистанцира од Трамп, Рубио го избрал патот на прифаќање на движењето МАГА.
Висок функционер на Белата куќа, кој зборувал анонимно, го опишал Рубио како „лојален, исклучително паметен, елоквентен и многу искусен“, додавајќи дека е „победник“.
Трамп сè уште не поддржал наследник, а неговото мислење може да биде пресудно. Ако Рубио се соочи со Венс или со друг кандидат, ќе мора од улога на член на кабинетот да премине во улога на кандидат, што во последните години се покажа како тежок политички чекор.
Анкетите покажуваат дека Рубио расте, иако Венс и понатаму убедливо води. Анкета на ЦПАК од минатиот месец му даде на Рубио 35 проценти поддршка, наспроти 3 проценти минатата година, додека Венс имаше 53 проценти.
Разговорите во Западното крило сега го вклучуваат Рубио како реална опција за наследник на Трамп, тврдат функционери и лица блиски до администрацијата. Неговите поддржувачи го истакнуваат неговото искуство и двојната улога како државен секретар и советник за национална безбедност.
Таа позиција му овозможува близок пристап до Трамп и учество во клучни одлуки. Поранешниот портпарол на Белата куќа Шон Спајсер изјави дека токму двојната улога му дала на Рубио многу време и пристап до претседателот и до движењето МАГА.
Дел од неговиот подем се поврзува и со политиката на администрацијата кон западната хемисфера. Рубио бил вклучен во акции поврзани со Венецуела и Куба, како и во прашања за имиграција, визи и построг пристап кон странски државјани.
Во негова корист оди и тоа што досега избегнал скандали и јавни моменти што би можеле да го засенат Трамп. Во Белата куќа не се доживува како личност што влегува во конфликт со претседателот.
Сепак, Рубио нема целосна поддршка во популистичкото крило на МАГА. Дел од десницата и натаму му ги забележува претходните надворешнополитички ставови и го смета за премногу традиционален републиканец.
Поранешниот советник на Трамп, Стив Кортес, оцени дека партиските донатори и дел од носителите на одлуки веруваат дека Рубио е доволно близок до МАГА за да ги привлече гласачите. Но, според него, Рубио во суштина останува повеќе традиционален републиканец, што може да не биде доволно убедливо во популистичката ера.
И покрај растот на Рубио, Венс останува главен фаворит. Тој води во анкетите, има силна мрежа на сојузници во администрацијата и надвор од неа, меѓу кои се Доналд Трамп Помладиот и Илон Маск.
Рубио, пак, допрва ќе треба да одлучи дали воопшто сака да се кандидира. Трамп, кој ќе има клучна улога во изборот на републиканскиот кандидат, најверојатно нема да донесе конечна одлука пред изборите на средина од мандатот.
