Штип на 30 и 31 октомври ќе биде домаќин на 41. издание на фестивалот на забавни мелодии „Макфест“, каде докажани автори и нови изведувачи ќе се натпреваруваат за вниманието на публиката. Со композиции во различни музички изрази, манифестацијата носи спој на децениско искуство и дебитантска енергија. Организаторите ветуваат певливи рефрени со амбиција да влезат во уво и да останат на домашниот радиоетер долго по завршувањето на фестивалските вечери.

Списокот на автори за претстојното издание открива силна концентрација на имиња што со децении го креираат домашниот поп-звук. Ристо Самарџиев, Огнен Неделковски, Хари Котларовски и Александар Масевски носат класичен фестивалски печат, додека авторите како Раде Врчаковски – Врчак, Јован Јованов, Елвир Мекиќ и Лазар Цветковски гарантираат урбан поп и R&B ритам.

Во трката за нови рефрени влегуваат и Кристијан Габроски, Роберт Билбилов, Андријана Јаневска, Давор Јордановски, Димитар Андоновски и Иван Јованов. Оваа авторитетна постава најавува разновиден жанровски судир на сцената во Штип.

Уметничкиот директор на фестивалот, Роберт Саздов, посочува дека годинашниот концепт се потпира врз силен авторски печат и композиции со различен карактер. Тој очекува мелодии кои лесно комуницираат со слушателите.

„Годинава имаме навистина интересен избор на автори – докажани музички имиња, автори со свој препознатлив стил и песни зад кои стои големо искуство. Очекувам и ова издание да донесе убави, певливи песни и композиции со различен карактер, од оние што лесно влегуваат во уво до песни кои ќе се слушаат и по фестивалските вечери. Тоа е и убавината на „Макфест“ “, вели Саздов.

Штипскиот фестивал преку ова издание ја продолжува четиридецениската приказна, ставајќи ги новите композиции на тест пред публиката на 30 и 31 октомври.