Охрид и годинава ќе биде место на кое ќе се соберат истражувачи и изучувачи на македонскиот јазик од различни делови на светот. На 59. Летна школа на МСМЈЛК при УКИМ ќе учествуваат 60 македонисти, слависти, балканолози, филолози, културолози и преведувачи од 17 земји. 

Учесниците доаѓаат од Албанија, Аргентина, Бугарија, Италија, Јапонија, Канада, Кина, Полска, Русија, САД, Словачка, Словенија, Србија, Турција, Унгарија, Франција и Хрватска. Школата ќе се одржува во Конгресниот центар на УКИМ во Охрид, а свеченото отворање е предвидено за 20 август. 

На отворањето се очекуваат обраќања од ректорката на УКИМ, проф. д-р Биљана Ангелова, директорката на МСМЈЛК при УКИМ, проф. д-р Кристина Николовска, и министерката за образование и наука, проф. д-р Весна Јаневска. 

Богата програма посветена на јазикот и културата

Програмата на Летната школа предвидува лекторски вежби и предавања, но и интерактивна и амбиентална настава во стариот дел на Охрид.

Учесниците ќе имаат можност да следат и курс по македонски народни ора, да учествуваат во преведувачка работилница, како и во културно уметничка програма, промоции и научна екскурзија. 

На свеченото отворање ќе бидат доделени и наградите за македонистика. Најголемата награда „Воздејства“ годинава ќе ѝ припадне на проф. д-р Кристина Крамер од Канада.

Благодарници „Синергии“ ќе им бидат доделени на министерката Весна Јаневска и на Државна лотарија на Северна Македонија. 

По летната школа следува и голема научна конференција

Програмата не завршува со Летната школа. По неа ќе се одржи и 53. Меѓународна научна конференција, на која ќе учествуваат 75 научни истражувачи од Македонија и странство.

Тоа значи дека вкупно 135 македонисти, студенти, предавачи и научни истражувачи, ќе бидат дел од програмите посветени на македонскиот јазик, литературата и културата. 

Во рамките на програмата ќе бидат претставени и шест нови зборници. Меѓу нив се изданија од минатогодишната Летна школа и Меѓународната научна конференција, како и три зборници од преведувачката работилница посветени на Гане Тодоровски, Петре Андреевски и Анте Поповски.

Ќе биде промовирано и изданието „Излишно писмо до Бога“ со препеви на полски јазик од проф. д-р Маќеј Кавка. 

Македонскиот јазик се изучува на 12 лекторати во странство

МСМЈЛК во последните години бележи и зголемување на бројот на лекторатите по македонски јазик во странство.

Во изминатите три години се отворени лекторати во Тирана и Нитра, а е возобновен и најстариот лекторат во Неапол. Со тоа, бројот на лекторатите по македонски јазик во странство достигна 12. 

Летната школа во Охрид има долга традиција и претставува еден од најзначајните меѓународни настани посветени на изучувањето и афирмацијата на македонскиот јазик, литература и култура.

Годинава, 59. издание повторно ќе ги собере луѓето кои македонскиот јазик го изучуваат, предаваат, истражуваат и преведуваат надвор од земјата, со што Охрид и овој август ќе биде место на меѓународна македонистичка средба.