Македонија веќе има две сигурни медали од боречките натпревари на Медитеранските игри „Таранто 2026“. Фати Вејсели и Реџеп Хајдари ги добија своите полуфинални борби и во понеделник ќе излезат на душекот во битка за медитеранското злато.
Вејсели, кој настапува во слободен стил во категоријата до 74 килограми, во полуфиналето го совлада турскиот репрезентативец Јасин Јесил со 5:3. Македонскиот борач со тоа ја продолжи победничката серија во Таранто и обезбеди најмалку сребрен медал.
До полуфиналето Вејсели стигна со две претходни победи. На стартот го совлада Хаиредин Бен Тлили од Тунис со 6:3, а потоа беше подобар и од Египќанецот Омар Мурад со 4:1. Неколку минути по успехот на Вејсели, место во финалето обезбеди и Реџеп Хајдари во категоријата до 97 килограми. Хајдари во тесна и неизвесна полуфинална борба го победи Французинот Адлан Висханов со 3:2 и исто така обезбеди најмалку сребро за Македонија.
Неговиот пат до завршницата беше поинаков. Во групната фаза Хајдари загуби од грчкиот претставник Даурен Куруглиев со 0:10, но потоа убедливо го совлада Валид Чеик Лахлу со 11:0 и избори место во полуфиналето.
Со двете полуфинални победи, македонското борење во еден ден обезбеди два медала на Медитеранските игри, а останува отворено прашањето само за нивниот сјај. Според официјалниот распоред на „Таранто 2026“, финалните борби во машки слободен стил се закажани за понеделник, 24 август, во терминот од 18:00 до 20:30 часот. Натпреварите се одржуваат во „Пала Војтила“ во Мартина Франка.
Вејсели и Хајдари така ќе добијат можност двата веќе обезбедени македонски медала да ги претворат во златни. За Вејсели настапот во Таранто претставува и значително подобрување во однос на претходните Медитерански игри во Оран во 2022 година, кога во категоријата до 74 килограми го заврши натпреварувањето на седмото место. Хајдари, пак, во Таранто настапува во категоријата до 97 килограми, а годинава зад себе има и настап на Европското првенство за сениори.
