Загреб повторно се соочува со закани со бомби – утрово неколку основни и средни училишта во градот беа евакуирани по нови дојави, а загрепската полиција е на терен и моментално ги обработува пријавите.
Ова е само продолжување на веќе загрижувачкиот тренд. Вчера нов бран лажни закани предизвика евакуација на бројни училишта во Загреб, Сплит, Риека и Дубровник, но и на зградата на Градската администрација и Арена Центар во Загреб. Проценките покажуваат дека само минатата недела биле примени над 500 лажни пријави во пет последователни дена на адреси на училишта, градинки, трговски центри и други објекти низ цела Хрватска, вклучувајќи го и аеродромот во Сплит.
Министерот Божиновиќ потврди дека сите досегашни пријави се покажале како лажни, но нагласи дека полицијата нема да игнорира ниту една дојава. Тој посочи дека заканите доаѓаат од адреси во странство, поради што истрагата подразбира меѓународна соработка со партнерски служби, полиции на други земји и судски органи. Засега не се планира преминување на онлајн настава.
Психолошки последици врз децата
Иако станува збор за лажни закани, стручњаците предупредуваат дека нивните последици врз менталното здравје на децата се сосема реални. Психолошкиот центар „Карпе Дием” предупреди дека континуираното изложување на вакви ситуации (чести аларми, прекини на часовите и негативни вести) може да создаде трајно чувство на несигурност кај младите.
Директорот на центарот, Домагој Далбело, истакна дека кај децата може да се развијат проблеми со спиењето и концентрацијата, а светот почнуваат да го доживуваат како поопасно место отколку што навистина е. Родителите и наставниците се повикуваат да поттикнуваат отворен разговор, да даваат јасни информации прилагодени на возраста и да избегнуваат ширење паника.
Дополнителен проблем е изложеноста на децата на непроверени и вознемирувачки содржини преку медиумите и социјалните мрежи. Таквите информации можат да го засилат чувството на опасност и да го отежнат разликувањето меѓу реална и замислена закана. Поради тоа, психолозите ги повикуваат институциите и медиумите на одговорно известување, со фокус на проверени информации и заштита на менталното здравје на децата.
