Холивудскиот актер Кристијан Бејл отвори нов станбен комплекс во градот Палмдејл, Калифорнија, наменет за сместување на деца без соодветна родителска грижа. Проектот наречен „Together California“, кој официјално започна со работа минатиот петок, има примарна цел да ги задржи заедно биолошките браќа и сестри што влегуваат во системот за згрижување. Селото ќе ги прими првите станари веќе следниот месец.

Комплексот зафаќа површина од околу илјада квадратни метри и се состои од 12 опремени куќи. Две од овие единици се гарсониери наменети за младинци кои полнолетни излегуваат од социјалниот систем и учат да живеат самостојно.

Остатокот од капацитетите е целосно приспособен за поголеми семејства. Округот Лос Анџелес брои над 30.000 згрижени деца, што претставува најголема ваква популација во Соединетите Американски Држави. Браќата и сестрите во овој систем редовно завршуваат разделени на различни адреси поради недостиг од домови со доволен капацитет.

„Нашата работа е нивната тага и болка да ја претвориме во љубов, надеж и чувство за иднина“, изјави Бејл за американската мрежа ABC 7 за време на пресекувањето на лентата.

Идејата за комплексот потекнува од личниот живот на глумецот. По раѓањето на сопствените деца со сопругата Сиби Блажиќ, Бејл почнал да ги истражува условите во кои растат децата без семејна заштита во неговото директно опкружување.

Тој во 2022 година заедно со Тим Мекормик ја основаше организацијата „Together California“. Изградбата целосно се потпираше на филантропски средства. Австриско-американскиот совет „West“ собра близу девет милиони долари за реализација на градбата, додека локалните власти од Лос Анџелес помогнаа во бирократските процедури и распределбата на парцелата.

Според раководството на проектот, семејствата добиваат целосна социјална, психолошка и менторска помош од стручни лица директно во населбата, со цел да се избегне траумата од институционално сместување.