Речиси четвртина од возрасните Британци признаваат дека си заминале со предмет од ресторан или бар, покажуваат податоците на добавувачот на опрема „Нисбетс“. Од седефни лажички за десерт до цели термостати, угостителите сè потешко се справуваат со гостите за кои платената сметка значи и автоматско право на „бесплатен сувенир“. Само штетата од украдено стаклено посуде во Европа достигна 220 милиони евра во 2023 година.

Француски ресторани со Мишелин ѕвездички неодамна пријавија исчезнување на свеќи, ножеви, па дури и држачи за тоалетна хартија извадени заедно со шрафовите и типлите. Сличен проблем пријави и сопственик на локал во Квебек, кому му ги изнеле помошната масичка, слика од ѕидот и собниот термостат.

Во Бристол, Џен Остл од ресторанот „Вилсон“ редовно купува нови комплети од седефни лажички за сорбе бидејќи гостите ги сметаат за идеален џебен трофеј.

„На секои неколку месеци морам да купам нови 28 парчиња“, изјави Остл за Би-би-си.

Според психијатарот д-р Клаудија Ајмерих, мотивот ретко е материјална потреба. Гостите често бараат возбуда или сакаат физички доказ за доживувањето, претворајќи го предметот во личен трофеј од престижно место.

Втор пресуден фактор е чувството на право. Потрошената поголема сума пари кај дел од гостите создава впечаток дека сметката покрива и ситен инвентар, па земањето на чашата или лажичката го доживуваат како заслужен бонус за потрошеното.

Реакциите на сопствениците варираат од директен конфликт до маркетиншки трикови. Британскиот готвач Том Ејкинс уште во 2012 година лично влезе во расправија со гостин фатен на дело, додека мексиканскиот синџир „Вахака“ понуди бесплатни такоси за секој што доброволно ќе ги врати нивните препознатливи шарени лажици.

Загубите на крајот паѓаат врз сметките на сите потрошувачи. Додека менаџерите тестираат камери и дигитални менија, наједноставниот излез за покривање на трошоците останува тивкото покачување на цените на храната и пијалаците.