Кујнскиот сунѓер изгледа безопасно, но условите во него се идеални за развој на бактерии. Влажен е, топол, полн со ситни пори и во него често остануваат микроскопски остатоци од храна. Истражување објавено во списанието Scientific Reports открило 362 различни видови бактерии во користени кујнски сунѓери. Во одредени примероци била измерена густина од дури 54 милијарди бактерии на кубен сантиметар.
Зошто микробрановата не е сигурно решение?
Особено интересен е резултатот поврзан со чистењето на сунѓерите. Научниците споредиле сунѓери чии сопственици редовно се обидувале да ги дезинфицираат со варење, микробранова печка или машина за садови, со сунѓери кои воопшто не биле третирани на овој начин.Очекувале дезинфицираните сунѓери да имаат помалку бактерии.
Но, резултатите биле поинакви. Кај редовно „дезинфицираните“ сунѓери бил забележан поголем удел на бактерии поврзани со потенцијално патогени видови.
Причината може да биде процесот на селекција: топлината може да уништи голем дел од бактериите, но оние што ќе преживеат се поотпорни. Откако конкуренцијата ќе исчезне, преживеаните бактерии повторно можат брзо да се размножуваат. Тоа не значи дека секое ставање сунѓер во микробранова нужно ќе создаде опасни бактерии, туку дека самото „дезинфицирање“ не е гаранција дека сунѓерот ќе остане хигиенски чист.
Најдобро решение? Едноставно сменете го
Наместо постојано да се обидувате да го спасите стариот сунѓер, препораката е многу поедноставна: Менувајте го редовно, најмалку еднаш неделно. По употреба, сунѓерот треба добро да се исплакне, да се исцеди и да се остави целосно да се исуши на место со добра циркулација на воздухот.
Сунѓер оставен влажен во мијалникот создава идеална средина за размножување на микроорганизмите.
Не чистете сурово месо со сунѓер
Една од најважните навики е да не го користите истиот сунѓер за површини на кои имало сурово месо. За такви површини подобро е да се користи хартиена крпа која веднаш ќе се фрли или крпа која веднаш ќе оди на перење.
Причината е едноставна: сунѓерот не ги отстранува нужно микроорганизмите – може само да ги собере и потоа да ги пренесе на следната површина што ќе ја избришете.
Не е само сунѓерот
Меѓу местата во кујната на кои треба да им се посвети внимание се и мијалникот и одводот, славината, рачките од фрижидерот и рерната, како и кујнските крпи. Особено проблематични можат да бидат крпите кои постојано остануваат влажни и се користат со денови.
Затоа, наместо да се потпирате само на „дезинфицирање“ на сунѓерот, наједноставната стратегија е редовно менување, добро сушење и одделни средства за чистење на површини кои биле во контакт со сурово месо.
