Уверувањето дека кризата во бракот демне дури околу седмата година паѓа пред податоците од новата анкета спроведена меѓу 2.000 корисници на специјализираната платформа Illicit Encounters. Истражувањето покажува дека партнерите многу порано се соочуваат со искушението да побараат внимание надвор од врската, а најголемиот удар врз заедничкиот живот се случува значително пред влезот во првата деценија.
Додека традиционалната психолошка рамка предупредуваше на замор на материјалот по седум години брак, новите бројки покажуваат сосема поинаков распоред на кризите. Дури третина од испитаниците, односно 33 отсто, признале дека својата прва вонбрачна афера ја започнале веќе во третата година од бракот. За споредба, фамозната седма година денес бележи неверство кај само 10 проценти од анкетираните.
Брачните завети почнуваат да попуштаат речиси веднаш по стивнувањето на почетната брачна еуфорија. Во првите 12 месеци од заедничкиот живот, седум отсто од партнерите веќе го прекршиле ветувањето за верност, додека во втората година тој процент изнесува пет отсто. Бројките повторно растат по четвртата и петтата година, кога 12 проценти од луѓето влегле во афера, додека во шестата година тоа го направиле 11 отсто.
Мотивите за барање утеха или возбуда на друго место се главно врзани за емотивното и физичкото оддалечување. Речиси половина од анкетираните посочиле дека главниот поттик за прељуба бил постепениот недостиг на интимност меѓу партнерите.
За една четвртина од испитаниците, пресвртната точка настапила со раѓањето на децата. Оваа животна промена носи поинаков ритам, нови притисоци и хроничен недостиг на време за двајцата, што често создава јаз меѓу сопружниците. Преостанатите 16 проценти одговориле дека вонбрачната авантура ја започнале едноставно од здодевност и потрага по адреналин.
„Во овој брз свет, паровите доаѓаат до проблеми многу порано отколку што тоа беше случај во минатото“, изјави Џесика Леони од Illicit Encounters, коментирајќи ги промените во однесувањето на современите брачни партнери.
Терапевтите за врски потсетуваат дека последиците од ваквиот чин оставаат длабоки траги. За обновување на разнишаната доверба и залечување на емотивните рани, на изневерениот партнер вообичаено му се потребни меѓу една и две години интензивен напор и искрена комуникација.
