Додека комарците секое лето се неизбежен проблем, кинески тим разви необично технолошко решение – ласерски систем кој може автоматски да ги открива, следи и погодува додека летаат.

Уредот наречен Photon Matrix е развиен во кинескиот град Чангџоу и користи LiDAR технологија за детектирање ситни летечки цели. Откако ќе препознае комарец, системот насочува ласер кон него со цел да му ги оштети крилјата.

Според China News Service, системот испраќа десетици илјади точки во секунда и може да препознае комарец за околу три милисекунди. Производителот тврди дека ласерот може да реагира и до 30 пати во секунда.

Три години го развивале системот

Основачот Ванг Чуан и неговиот тим почнале да работат на проектот во 2022 година. До 2024 година, според нивните тестирања, системот достигнал стапка на детекција од 97 проценти на растојание до три метри.

Поголемо внимание проектот добил откако на социјалните мрежи се појавило видео снимено на отворено, на кое се гледа како системот открива и погодува комарци во лет.

Интересот брзо се претворил и во финансиски успех. Проектот преку групно финансирање собрал околу 2,7 милиони долари, иако првичната цел била само 20.000 долари. Повеќе од 4.000 поддржувачи од над 50 земји платиле околу 630 долари за уредот.

Што ако пред ласерот помине човек?

Едно од главните прашања е безбедноста. Според производителот, Photon Matrix има механизми кои треба да спречат активирање на ласерот доколку во зоната се појави човек, домашно милениче или друг поголем објект.

Предвидени се верзии со видлив син и со инфрацрвен ласер, наменети за различни услови на користење.

Сепак, уредот сè уште не е производ чија ефикасност е потврдена со долгогодишна масовна употреба. Компанијата претходно ја одложувала комерцијализацијата, а масовното производство е најавено за август 2026 година.

Затоа и податоците за брзината, прецизноста и безбедноста засега во голема мера се темелат на тестирањата и тврдењата на самиот производител. Вистинската проверка ќе дојде кога Photon Matrix ќе стигне до поголем број корисници и ќе се појават независни тестови.