Џенсен Хуанг често им раскажувал на соговорниците дека за успехот најмногу ѝ должи на сопругата Лори. Се запознале во осумдесеттите години, кога двајцата студирале електротехника. На еден гостин, за време на дружење со коктели во Сан Франциско по уште еден рекорден квартал за компанијата, му раскажал дека секоја вечер се враќа дома до 18:30 часот на вечера што ја подготвува Лори.
И приватно, семејството изгледало многу поврзано. Ќерката Медисон им раскажувала на колегите дека родителите градат имот на кој сите ќе живеат заедно. Компанија поврзана со Хуанг купила куќа со земјиште во вредност од 23,6 милиони долари, во ридовите над Силициумската Долина.
Ќерката, синот и зетот
Медисон Хуанг се вработила во „Енвидија“ во 2020 година, по образование за готвачка и сомелиерка и работно искуство во маркетингот на групацијата ЛВМХ. Почнала како практикантка, но брзо напредувала. Денес има висока позиција во одделот што развива модели на вештачка интелигенција за симулации. Според вработените, практично била шефица на кабинетот на татко ѝ.
Била и членка на мала група раководители, позната во компанијата како „Бенд“. Оваа група патувала низ светот со Хуанг и ги подготвувала неговите јавни настапи. Медисон во последен момент ги менувала видеоматеријалите што се прикажувале за време на неговите говори, а пред конференцијата во Тајпеј во 2025 година работела со него и на текстот на говорот.
Нејзиниот брат Спенсер Хуанг работи во роботскиот оддел на „Енвидија“. Вработените го опишуваат како потивок од сестра му, а некои раководители велат дека никогаш немале директен деловен контакт со него.
Сопругот на Медисон, Нико Капрец, поранешен натпреварувач во скијање, кого го запознала на бизнис-школа во Лондон, се приклучил на „Енвидија“ во 2024 година. Во јануари станал потпретседател. Тој е еден од клучните луѓе задолжени за односите со давателите на услуги во облак и за финансиските гаранции што компанијата им ги нуди на клиентите.
„Кралско семејство“ во технолошкиот гигант
Брзото напредување на Медисон Хуанг и Капрец предизвикувало тензии во компанијата. Двојката знаела да ги критикува вработените, вклучително и високи раководители со децениско искуство во „Енвидија“.
Поранешни високи функционери на компанијата велат дека на состаноците било очигледно оти двајцата веќе ги знаат информациите што другите ги слушаат за првпат. Тие пренесувале и пораки што ги претставувале како желби или одлуки на Хуанг.
Медисон поставувала непријатни прашања дури и на големи состаноци, а некои вработени се жалеле на нејзиното однесување во одделот за човечки ресурси. Не е познато дали компанијата презела нешто по тие поплаки.
Вработените што заборавале нешто ги нарекувала „златни рипки“, а, како и татко ѝ, го користела изразот „мртво лице“ за празните изрази на лицата на колегите по критиките. Еден од соговорниците на „Волстрит џурнал“ изјавил дека во компанијата кон Хуанг и неговите деца се однесувале како кон „кралско семејство“.
Сепак, дел од колегите ја бранат Медисон. Тие велат дека била строга затоа што била посветена на мисијата на компанијата и дека нејзиниот стил е последица на рамната организациска структура. Ја споредуваат со готвач или тренер кој поставува високи барања.
Медисон Хуанг оваа година, на средба со студенти на Националниот универзитет во Сеул, изјавила дека е привилегија да се работи во семеен бизнис – не само поради сопственото семејство, туку и затоа што вработените во „Енвидија“ се „како едно големо семејство“.
Шише виски за Алис
Медисон и Капрец го придружувале Хуанг и на деловните патувања, меѓу кои и на вечера во Тајпеј во 2025 година. На таа вечера Хуанг бил фотографиран со Алис Хуанг, со која, според претходните објави, неодамна признал дека бил во врска.
За време на вечерата, Хуанг им се заблагодарувал на азиските клиенти, а на Алис ѝ подарил шише тајванско виски со свој потпис. Хуанг ја водел „Енвидија“, компанија со околу 40.000 вработени, речиси без класична корпоративна структура. Имаше околу 60 директно подредени, не сакал состаноци во четири очи, а неодамна канцеларијата ја заменил со голема сала со маса за триесетина луѓе и шкафче за виски.
Длабоко се мешал во работата на инженерските тимови, но и во секојдневните оперативни одлуки.
Харизма, но и јавно понижување
Многу вработени го паметат како харизматичен лидер кој се интересирал за нивниот живот, ги посетувал канцелариите и лично им се заблагодарувал за придонесот. По состаноците на целата компанија, новите вработени чекале и по еден час во ред за да се фотографираат со него.
Други, пак, го опишуваат како тежок шеф кој ги понижувал луѓето пред колегите. Поранешниот висок раководител Роб Цонгор раскажува дека Хуанг знаел да му каже на некого: „Прашањето ти е глупаво“. Сепак, Цонгор смета дека токму таквата интелектуална директност е една од причините за успехот на „Енвидија“.
Според соговорниците на „Волстрит џурнал“, ваквите испади во последните години станувале сè почести. Неодамна, на утрински состанок на извршниот тим, Хуанг со навредливи зборови го искарал високиот раководител Владимир Трој поради доцнењето во изградбата на центрите за податоци.
Од кожна јакна до обезбедување
Со текот на годините, Хуанг стана глобална ѕвезда. До 2016 година ги заменил спортските сакоа со црна кожна јакна, се појавувал на ноќни пазари во Азија и преговарал со влади.
На интерните состаноци почнал да доаѓа со припадници на обезбедувањето од компанијата „Гевин де Бекер енд Асошиејтс“. Забранил и снимање на помалите состаноци – првично за присутните да бидат повнимателни, а подоцна и поради страв од протекување информации. На вработените што се жалеле дека немаат теретана им порачувал да трчаат надвор. Постепено ги укинал и празничните забави, објаснувајќи дека повеќе сака луѓето тоа време да го поминуваат со семејствата.
Хуанг и „Енвидија“ одбиле да коментираат за „Волстрит џурнал“. Медисон и Спенсер Хуанг и Нико Капрец не одговориле на прашањата на весникот.
