Кина кон крајот на април ѝ испрати на Европската Унија една од најдиректните трговски закани во последните децении, предупредувајќи дека ќе преземе контрамерки ако Брисел продолжи со усвојување на Законот за забрзување на индустријата, познат како „Made in Europe“. Пекинг тврди дека законот ги нарушува интересите на кинеските компании и воведува дискриминаторски правила за странските инвестиции.
Предлогот на Европската комисија цели да ја зајакне европската индустрија во три стратешки сектори: чисти технологии, автомобилска индустрија и енергетски интензивни индустрии како челик, алуминиум и цемент. За електричните автомобили што добиваат јавна поддршка се предвидува најмалку 70 проценти од компонентите, без батеријата, да бидат произведени во ЕУ, додека за одредени индустрии се воведуваат и минимални прагови за нискојаглеродна содржина.
Кинеското Министерство за трговија оцени дека законот воведува рестриктивни барања за странските инвеститори и може да ги наруши принципите на Светската трговска организација. Пекинг бара од ЕУ да ги отстрани, како што ги нарекува, дискриминаторските услови, ограничувањата во јавните набавки и барањата што би можеле да значат пренос на технологија или интелектуална сопственост.
Паралелно, ЕУ отвора уште еден фронт кон кинеската трговија: од 1 јули 2026 година секоја мала пратка под 150 евра што влегува во Унијата ќе се царини со фиксна такса од 3 евра по тарифна ставка. Мерката директно го погодува моделот на платформи како Shein и Temu, кои досега се потпираа на евтини директни испораки кон европските потрошувачи.
Судирот меѓу Брисел и Пекинг веќе не е само спор околу царини и технички правила, туку борба за иднината на европската индустрија. Европа се обидува да ги заштити работните места и производството, Кина бара пласман за своите индустриски вишоци, а американскиот пазар е сè позатворен. Во таа пресметка, „Made in Europe“ станува многу повеќе од економски закон. Станува тест за тоа колку ЕУ е подготвена да ја брани сопствената индустриска независност.
