Инспекциските служби на Општина Центар, заедно со МВР, излегоа на терен по инцидентот на булеварот „Теодосиј Гологанов“, во близина на Католичката црква, каде при градежни активности беше оштетена јавна површина и инфраструктура.

Од Општина Центар соопштија дека по извршениот увид биле констатирани оштетувања на коловозот, тротоарот, канализационата мрежа и уличното осветлување.

Поради тоа, како што информираат од општината, веднаш биле изречени најстроги законски казни и санкции кон инвеститорот за непочитување на обврските и предизвикување штета врз јавната инфраструктура.

Паралелно со инспекцискиот надзор, екипи на Општина Центар ја обезбедиле локацијата. Поставени се сигурносни појаси и предупредувачки ленти, со цел да се заштитат граѓаните и да се овозможи безбедно движење во близина на оштетениот простор.

„Општина Центар нема да толерира несовесно и неодговорно постапување од инвеститори, особено кога се загрозува безбедноста на граѓаните и се оштетува јавниот простор. За секое прекршување ќе следуваат ригорозни мерки согласно законските надлежности“, соопштија од општината.

Инвеститорот е задолжен итно да го обезбеди просторот, да преземе мерки за заштита и санација, како и целосно да ја врати оштетената инфраструктура во првобитна состојба.

Од Општина Центар велат дека остануваат на терен и дека ќе го следат случајот сè до целосно отстранување на последиците и обезбедување на безбедноста на граѓаните.

Жители на улицата „Христо Смирненски“ претходно испратија фотографии и видеа од градилиштето, тврдејќи дека за време на градежните активности дошло до свлекување на земјиштето. Според нив, багер работел на градилиштето иако денот бил неработен, а околу 13:30 часот почувствувале тресење, кое го поврзуваат со свлекувањето на земјата.