Култното музичко радио Канал 103 одбележува 35 години постоење со бесплатен концерт на отворено на швајцарскиот состав Orchestre Tout Puissant Marcel Duchamp. Настапот ќе се одржи в четврток, на 1 октомври во 21:30 часот, на платото пред Домот на Армијата во Скопје. Настанот е плод на соработка со колективите Мртов коњ и фестивалот Ѕирни, со поддршка од Министерството за култура и туризам и Амбасадата на Швајцарија.

Orchestre Tout Puissant Marcel Duchamp годинава бележи сопствен јубилеј од 20 години работа. Основан е во Женева во 2006 година од басистот и композитор Vincent Bertholet. Во изминатите две децении составот смени неколку постави и сними шест студиски албуми, профилирајќи се како еден од најнепредвидливите бендови на европската сцена.

Звучната слика на оркестарот спојува африканска полиритмија, highlife, слободен џез, пост-панк, краутрок и авангардна импровизација. Форматот брише строги стилски граници и функционира како постојано променлив музички колектив.

Името на бендот влече двоен корен. Првиот дел е омаж за големите африкански состави од 20 век, особено бендот Tout Puissant Orchestre Poly-Rythmo de Cotonou од Бенин. Вториот дел директно упатува на францускиот уметник Marcel Duchamp и неговото радикално рушење на конвенциите во уметноста.

Помеѓу овие две естетики се движи и нивниот израз. Музичарите нагласуваат дека фокусот секогаш останува врз колективната енергија, каде поединечните инструменти и изведувачи се подредени на целокупната звучна маса.

На сцената пред Домот на Армијата бендот ќе настапи во формација од 12 музичари. Оркестарот опфаќа бас, комплет тапани, перкусии, електрични гитари, маримби, виолина, виолончело, дувачка секција и повеќе вокали.

Живите изведби на оркестарот се потпираат врз градење хипнотички, повторливи ритами кои постепено преминуваат во хармониски наплив. Аранжманите комбинираат строга дисциплина со слободна импровизација, придружени со кратки, поетски текстови што комуницираат директно со публиката.