Вториот осомничен во италијанската истрага за таканареченото „Сараево сафари“ се бранел со молчење на распитот пред обвинителството во Милано, додека преку својата адвокатка тврдел дека немал никаква врска со делата за кои е под истрага. Според италијанската агенција АНСА, станува збор за 64-годишен маж од регионот Алесандрија, кој е осомничен за продолжено убиство со отежнувачки околности, односно дека плаќал за да учествува во убивање цивили во Сараево за време на опсадата од 1992 до 1995 година.
Неговата одбрана тврди дека тој само се фалел со приказни што ги слушал од други луѓе и дека си присвојувал туѓи искуства. Во писмена изјава доставена до истражителите навел дека од пријатели и познаници слушал за патувања од Италија кон Босна, организирани преку луѓе што се претставувале како платеници, но не открил имиња ниту потврдил директно учество. Според неговата адвокатка, тој никогаш не служел војска и немал ниту финансиска можност да плаќа за такви „игри на војна“.
Истрагата во Италија се однесува на наводите дека странци, меѓу нив и Италијанци, за време на опсадата на Сараево плаќале за да пукаат во цивили од позициите на босанските Срби. Првиот осомничен во случајот, 80-годишен поранешен возач на камион од околината на Порденоне, уште во февруари негираше вина на распитот во Милано. Обвинителите истражуваат дали осомничените биле директни извршители или имале логистичка улога во овие патувања.
Случајот повторно ги отвори раните од опсадата на Сараево, која траеше од 1992 до 1995 година и се смета за една од најдолгите во современото војување. Според податоците што ги наведува Reuters, во градот биле убиени околу 11.000 цивили од гранатирање и снајперски оган од позициите околу Сараево, а многу од тие убиства се поврзуваат со систематско тероризирање на цивилното население.
Во моментов, според АНСА, под истрага се вкупно четири лица. Италијанското обвинителство продолжува да собира сведоштва и докази во соработка со меѓународни правосудни институции, а следните распити треба дополнително да покажат дали приказната за „Сараево сафари“ ќе остане на сведоштва и медиумски тврдења или ќе добие и цврста судска потврда.
