Истанбул сè уште закрепнува од дводневните поплави во кои загинаа најмалку три лица, а метеоролозите веќе предупредуваат на нови обилни дождови. Во градот со 16 милиони жители во тек е потрага по четири исчезнати лица, јавува германската агенција ДПА (dpa).

Метеорологот на турската Главна управа за метеорологија, Абдула Маџит, предупреди дека обилни врнежи повторно се очекуваат утре, особено во северните и источните делови на Истанбул, пренесува турската државна новинска агенција Анадолија.

Бидејќи тлото е веќе целосно натопено со вода, постои опасност од нови поплави дури и доколку паднат помали количини дожд. Маџит им советуваше на граѓаните во сабота да патуваат со автомобили само доколку тоа е навистина неопходно. Според прогнозите, обилните дождови би требало да почнат да слабеат во недела наутро.

Истанбул во средата беше погоден од бројни поројни поплави и одрони. Водостоите на одредени подрачја значително пораснаа, поплавени беа подруми, а луѓе остануваа заробени во автомобилите на потопените улици.

Според податоците на градскиот Центар за координација во вонредни ситуации (AKOM), во населбата Бејкоз, на северот од азискиот дел на Истанбул, беа измерени повеќе од 277 милиметри дожд. Тоа е најголемата количина врнежи забележана на тоа подрачје уште од 1942 година.

Турскиот министер за внатрешни работи Мустафа Чифтчи изјави дека во Истанбул се ангажирани повеќе од 46.000 припадници на службите за одговор при катастрофи, крајбрежната стража, жандармеријата, градските служби и волонтери. Службите сè уште трагаат по четирите исчезнати лица.