Зголемувањето на случаите на рак на дебелото црево кај помладите сè уште не е целосно објаснето, но според гастроентерологот Partha Nandi, исхраната има клучна улога. Тој предупредува дека модерниот начин на исхрана, богат со ултрапреработени производи и шеќери, сериозно го нарушува цревниот микробиом и го зголемува ризикот од болести.
Здравиот микробиом, составен од милијарди корисни бактерии, е основа за силен имунитет. Кога е нарушен поради лоша исхрана, организмот станува поподложен на воспаленија и развој на хронични заболувања. Добрата вест е дека промените во исхраната можат релативно брзо да донесат позитивни ефекти.
Нанди препорачува фокус на природни и непреработени намирници. Во неговата исхрана доминираат овошје, зеленчук, интегрални житарки и растителни протеини, како и ферментирана храна како кефир и кисела зелка, кои го поттикнуваат растот на корисните бактерии.
За појадок најчесто избира јогурт со свежо овошје, со што добива природна сладост и пробиотици. Ручекот му е најобилен оброк и обично се состои од голема салата со разновидни состојки како мешунки, јајца или риба, што обезбедува енергија во текот на денот и ја намалува потребата од нездрави ужини.
Вечерата е полесна и се базира на зеленчук и протеини, со додаток на зачини како куркума и ѓумбир, кои имаат антиинфламаторно дејство. Тој избегнува газирани пијалаци и алкохол, бидејќи негативно влијаат врз дигестивниот систем.
Освен исхраната, Нанди истакнува дека и квалитетниот сон е неопходен за здравјето. Доволниот одмор му помага на телото да се регенерира и го зајакнува имунолошкиот систем, додека неговиот недостаток се поврзува со сериозни здравствени ризици.
