Оскарот на рускиот режисер Павел Таланкин, коавтор на документарецот „Mr Nobody Against Putin“, исчезнал откако американската аеродромска безбедност не му дозволила да го внесе како рачен багаж на лет од Њујорк кон Франкфурт. Според неговиот корежисер Дејвид Боренстајн, службеници на ТСА на аеродромот ЏФК го оцениле трофејот како „потенцијално оружје“ и побарале да биде предаден како чекиран багаж.
Таланкин патувал со „Луфтханза“, а статуетката била спакувана во картонска кутија, означена и преземена од авиокомпанијата. Но, кога авионот слетал во Франкфурт, Оскарот не пристигнал со багажот. Боренстајн јавно побара помош од „Луфтханза“ и ТСА, прашувајќи дали Таланкин би бил третиран исто доколку бил познат актер или течно зборувал англиски.
Случајот предизвика бројни реакции на социјалните мрежи, каде многумина ја оценија ситуацијата како апсурдна. Таланкин за „Дедлајн“ изјавил дека му е „целосно збунувачки“ како Оскар може да се смета за оружје. Доколку статуетката не биде пронајдена, живите добитници на Оскар можат да побараат замена во ретки случаи на оштетување или губење.
„Mr Nobody Against Putin“ е документарен филм базиран на тајно снимени материјали од Таланкин, кој работел како видеограф во училиште во Карабаш, Русија. Филмот прикажува како по руската инвазија врз Украина во училиштата се воведуваат провоени пропагандни лекции и „патриотски“ активности.
Таланкин сега живее во егзил во Европа, откако ја напуштил Русија со материјалите што подоцна станале основа за филмот. Документарецот годинава го освои Оскарот за најдобар документарен филм, а во Русија неговата дистрибуција беше забранета поради, како што тврдеа властите, „негативен став“ кон владата и војната во Украина.
