Иранскиот функционер Мохсен Резаи, воен советник на врховниот лидер ајатолахот Мојтаба Хамнеи, изјави дека преговорите меѓу Техеран и Вашингтон се во ќор-сокак и дека евентуален договор зависи од тоа дали администрацијата на Доналд Трамп ќе се согласи да ослободи 24 милијарди долари замрзнати ирански средства.

Во интервју за CNN, Резаи порача дека Иран бара 12 милијарди долари да бидат одмрзнати веднаш по потпишување привремен договор, а уште 12 милијарди во подоцнежна фаза. Тој нагласи дека, според Техеран, не станува збор за американска отстапка, туку за ирански пари.

„Преговорите се во ќор-сокак и Трамп мора да го разбие тој застој. Топката е на неговата страна“, изјави Резаи.

Покрај финансиските услови, најголемо внимание предизвикаа неговите предупредувања за можен поширок конфликт. Резаи рече дека Иран не сака војна, но дека е подготвен да одговори доколку САД повторно воено се ангажираат против него. Според неговото предупредување, евентуален нов конфликт не би останал ограничен на Персискиот Залив, туку би можел да се прошири кон Индискиот Океан, Црвеното Море и Средоземјето.

Резаи ја отфрли можноста за директна средба меѓу Трамп и ајатолахот Хамнеи, наведувајќи дека разговорите сè уште се во почетна фаза и дека нема услови за таков состанок.

Тој се осврна и на Ормускиот Теснец, еден од најважните енергетски поморски премини во светот, тврдејќи дека Иран и Оман имаат суверенитет над овој коридор и дека Техеран би можел да воведе одредени надоместоци за бродовите што минуваат таму.

Според Резаи, доколку преговорите целосно пропаднат, Иран е подготвен и за најлоши сценарија, вклучително и американска копнена операција. Тој оцени дека неодамнешниот конфликт претставувал пресвртница за Исламската Република, тврдејќи дека Иран од него излегол како победник.