Иран соопшти дека неговите пристаништа се подготвени да обезбедат поморски услуги, техничка поддршка, снабдување и медицинска помош за бродовите што пловат низ Ормускиот Теснец и регионалните територијални води, во услови на продолжени тензии околу еден од најважните светски поморски правци.
Пораката ја испрати Иранската организација за пристаништа и поморство до командантите на трговските бродови што се движат во регионалните води, објави иранската државна агенција ИРНА. Според соопштението, сите пловила што минуваат низ територијалните води, особено низ иранските води и пристаништа, ќе можат да користат услуги за снабдување, гориво, здравствена и медицинска помош, како и материјали за одржување кога тоа е потребно.
Иранската организација најави дека пораката ќе се емитува преку поморските комуникациски мрежи и VHF-системот три пати дневно во период од три дена. Техеран го претставува потегот како дел од своите регулаторни и суверени обврски за безбедна и одржлива пловидба во Ормускиот Теснец.
Соопштението доаѓа во време на зголемени тензии меѓу Иран и САД околу движењето на бродовите низ Ормуз. Претходно, иранската Револуционерна гарда ги повика бродовите да користат само однапред назначени рути, предупредувајќи дека секое отстапување може да се смета за небезбедно и да предизвика „решителна реакција“.
Ормускиот Теснец останува клучна точка за светската трговија со енергенси, а секое нарушување на пловидбата низ овој коридор може брзо да се одрази врз цените на нафтата, транспортот и глобалните пазари. Францускиот претседател Емануел Макрон вчера разговарал со иранскиот претседател Масуд Пезешкијан за состојбата во Хормуз и ја нагласил потребата од слободен и безбеден поморски сообраќај.
