Иранските судски власти соопштија дека утрово бил погубен Ерфан Киани, маж обвинет за соработка со израелските тајни служби за време на големите протести во Иран во јануари.
Според судското издание „Мизан“, Киани бил осуден по постапка што ја одобрил Врховниот суд. Во објавата тој е опишан како еден од „главните ликови“ вклучени во, како што се наведува, „мисија организирана од Мосад“ за време на протестите во централната иранска покраина Исфахан.
Иранските власти го обвиниле Киани за уништување јавен и приватен имот, палење, поседување и користење молотови коктели, носење мачета, блокирање патишта, напад врз полицајци и ширење страв меѓу граѓаните.
Ова е деветто погубување во Иран од 19 март поврзано со обвиненија за јануарските протести.
Иранската влада призна дека повеќе од 3.000 луѓе биле убиени за време на протестите, а насилствата ги опиша како „терористички акти“ предводени од САД и Израел.
