Иран испратил нов предлог до Соединетите Американски Држави за завршување на војната, во обид да се деблокираат преговорите кои стагнираа во изминатиот период. Според иранската новинска агенција ИРНА, предлогот е доставен преку пакистански посредници, откако двете страни претходно постигнаа примирје на 8 април. И покрај тоа, разговорите продолжуваат со цел да се постигне траен мировен договор.
Паралелно со дипломатските напори, од Вашингтон пристигнуваат сигнали дека се разгледуваат и нови воени сценарија. Според американски медиуми, командантот на Централната команда на САД, адмирал Бред Купер, го информирал претседателот Доналд Трамп за можни опции, вклучително и таканаречен „конечен удар“ врз Иран.
На брифингot во Белата куќа биле претставени сценарија кои вклучуваат краток, но интензивен бран напади врз преостанатите воени капацитети, инфраструктурата и раководството на Иран, доколку САД решат да продолжат со воените операции.
Во меѓувреме, Пентагон размислува и за дополнително зајакнување на военото присуство во регионот, вклучително и распоредување на напредни системи како хиперсоничниот проектил „Dark Eagle“, кој може да погоди цели на далечина до околу 2.700 километри. Американските бомбардери B-1B веќе се присутни на Блискиот Исток и се подготвени за евентуална ескалација.
Конфликтот започна на 28 февруари, кога САД и Израел извршија напади врз Иран, по што Техеран возврати со удари врз американски сојузници и го затвори Ормускиот теснец – клучна рута за глобалната трговија со енергенси. Иако примирјето донесе привремено смирување, неуспешните преговори во Исламабад во средината на април покажаа дека ризикот од нова ескалација останува висок.
