Поради најавените високи температури од 1 до 7 август, Институтот за јавно здравје објави препораки за заштита од топлотен стрес и можните последици врз здравјето.
Според ИЈЗ, кога температурата на воздухот се приближува или ја надминува нормалната телесна температура од околу 36,7 степени, способноста на организмот да се лади значително се намалува. Високата влажност дополнително го отежнува испарувањето на потта и регулирањето на телесната температура.
Најранливи се лицата над 60 години, бремените жени, децата, хронично болните, социјално ранливите граѓани и работниците што работат на отворено.
Сонцето да се избегнува од 11 до 17 часот
ИЈЗ препорачува граѓаните да не се изложуваат директно на сонце и да ги избегнуваат активностите на отворено од 11 до 17 часот.
Доколку престојот надвор е неизбежен, потребни се почести одмори под сенка. Треба да се носи светла и лесна облека, очила за сонце и светла капа со широк обод.
Во домовите, прозорците и ролетните треба да бидат затворени во текот на денот, а просториите да се проветруваат навечер, кога надворешната температура е пониска. Кога е можно, треба да се престојува во климатизирани простории.
Пијте вода пред да почувствувате жед
Граѓаните треба да внесуваат доволно течности во текот на целиот ден, без да чекаат да почувствуваат жед. Најдобар избор е водата, а може да се консумираат и минерални безалкохолни пијалаци.
Треба да се избегнуваат алкохол, пијалаци со кофеин и премногу студени напивки. ИЈЗ препорачува умерени оброци и избегнување масна, висококалорична храна и производи со многу шеќер.
За дополнително разладување се препорачуваат туширање со млака вода, ладни облоги или потопување на стапалата во ладна вода.
Не оставајте никого во затворен автомобил
Температурата во целосно затворено возило може многу брзо да достигне опасно ниво. ИЈЗ предупредува дека во паркиран автомобил не смее да се остава никој – ниту човек ниту животно.
Посебно дисциплинирани треба да бидат лицата со кардиоваскуларни, белодробни, бубрежни и невролошки заболувања, дијабетес, дебелина или други хронични состојби.
Тие треба редовно да ја земаат пропишаната терапија, а за секоја промена во здравствената состојба да се консултираат со матичниот лекар.
Кои симптоми укажуваат на опасност?
Слабост, сува уста, вртоглавица, гадење, прекумерно потење, главоболка и мускулни грчеви може да бидат првите знаци дека телото не успева да се справи со високата температура.
Знаци на сериозен топлотен удар се:
- Престанување на потењето;
- Екстремно топла и сува кожа;
- Конфузија и зашеметеност;
- Забрзана работа на срцето;
- Отежнато дишење;
- Грчеви;
- Губење на свеста.
Доколку лицето има топла и сува кожа, грчеви или е во бессознание, веднаш треба да се повика итна медицинска помош на 194 или 112.
Додека пристигне помошта, лицето треба да биде преместено на постудено место, поставено во хоризонтална положба со нозете подигнати околу 20 сантиметри и разладувано со ладни облоги на вратот, пазувите и препоните. Ако е во бессознание, треба да биде поставено во странична положба и не треба да му се дава никаква терапија.
Целосните препораки се објавени на страницата на Институтот за јавно здравје.
