Израелската војска соопшти дека ќе продолжи со операциите во јужен Либан, иако меморандумот потпишан од САД и Иран предвидува „итно и трајно прекинување на воените операции на сите фронтови, вклучително и Либан“.

Израелската војска објави мапа за која вели дека ги покажува моменталните позиции на нејзините сили во јужен Либан, околу десет километри на територијата на Либан. Во соопштението се вели дека војниците се распоредени во „одредена зона на операции“ и ќе продолжат да ги „елиминираат заканите“.

Иако интензитетот на насилството се намали по договорот меѓу САД и Иран, ситуацијата на терен покажува дека војната во Либан не е завршена.

Нивото на масовно израелско бомбардирање на јужен Либан не е исто во последните денови, но израелските беспилотни летала продолжуваат да извршуваат напади. Во еден од најновите напади во градот Беит Јахун, во покраината Набатија, повредени се две лица, објави либанската национална новинска агенција.

Претходно, израелски дрон удри автомобил во близина на Кфар Тебнит. Според истиот извор, едно лице е убиено, а друго е тешко повредено.

Хезболах одговори на нападите

Хезболах одговори на израелските напади и вели дека нема да прифати прекин на огнот што би обврзувал само едната страна.

Израелската војска призна дека еден нејзин војник е убиен, а друг ранет во два напади на Хезболах во јужен Либан. Со тоа, движењето, според аналитичарите, испрати порака дека нема да прифати ситуација во која Израел продолжува да напаѓа, додека од Хезболах се очекува да покаже воздржаност.

Хезболах се чувствува зајакнат од договорот меѓу САД и Иран, верувајќи дека Техеран сега му дава дополнителен политички и воен простор. Неговата порака до Израел е дека може да зборува само за меѓусебна безбедност, додека на либанската влада јасно ѝ става до знаење дека нема да прифати разоружување.

Иран предупредува на последици

Како дел од договорот со САД, Иран побара Израел да ги запре нападите врз Либан и да ги повлече своите сили од окупираните територии.

Мостафа Кошчешм, професор на Универзитетот за применети науки во Техеран, за Ал Џезира изјави дека договорот меѓу САД и Иран би можел да пропадне ако Вашингтон не ја исполни својата обврска да ги ограничи израелските дејствија во Либан.

Според него, високи ирански претставници јасно ставиле до знаење дека Техеран ќе одговори доколку се прекршат условите од прекинот на огнот, вклучително и континуирани израелски напади врз Либан.

„ Сега сè зависи од тоа како САД ќе ги контролираат израелските напади “, рече Кошчешм.

Тој верува дека на Израел му е тешко да ја прифати новата ситуација и дека договорот меѓу САД и Иран дополнително ги продлабочува пукнатините во израелската влада. Тој додаде дека Израел би можел да се обиде да го наруши договорот, што, како што рече, ќе зависи од тоа колку Трамп ќе остане верен на текстот што го потпиша.

Клучен тест за Трамп

Либан на тој начин се претвора во првиот сериозен тест на американско-иранскиот договор. Доколку Израел продолжи со нападите, Хезболах веројатно ќе продолжи да возвраќа, а Иран би можел да го обвини Вашингтон дека не го исполнил својот дел од договорот.

Ова значи дека договорот, кој беше претставен како пресвртница за Блискиот Исток, од самиот почеток се потпира на прашање на кое сè уште нема одговор: дали Трамп навистина може да го ограничи Израел во Либан?