Хуавеј не успева да произведе доволно опрема и чипови за вештачка интелигенција за да ја задоволи ниту побарувачката на кинескиот пазар. Поради ограничениот производствен капацитет, компанијата засега не планира посериозно проширување на продажбата во странство. Тоа го изјави ротирачкиот претседател на Хуавеј, Ерик Сју, на конференцијата „Хуавеј Конект“ во Шангај.

„Немаме доволно капацитет ни за да ја задоволиме побарувачката во Кина, па засега не планираме посериозно да се шириме на меѓународниот пазар“, изјави Сју.

Компанијата сепак продава AI опрема во некои земји каде што постои побарувачка, но во ограничени количини.

Новиот чип помина тестирања

Хуавеј во последните години сè посилно се обидува да му конкурира на американскиот гигант Нвидиа на пазарот на чипови за вештачка интелигенција.

Сју изјави дека новиот чип „Асенд 950ДТ“ постигнал добри резултати на тестирањата. Компанијата веќе разговара со кинески фирми кои развиваат големи AI модели, а Сју очекува дел од нив во текот на следната година да започнат со користење на системите базирани на овој чип за тренирање на своите модели.

Хуавеј претходно најави дека „Асенд 950ДТ“ треба да биде достапен во последното тримесечје од годинава. Паралелно, компанијата развива и нови генерации чипови, како и големи компјутерски системи што поврзуваат илјадници процесори. Целта е ограничувањата на поединечните чипови делумно да се надминат преку нивно поврзување во поголеми системи.

Хуавеј тврди дека го престигнал Нвидиа во Кина

Сју тврди дека семејството чипови „Асенд“ веќе зазело поголем дел од кинескиот пазар на AI чипови од Нвидиа. Сепак, Хуавеј не објави податоци со кои би го поткрепил ова тврдење. Нвидиа и понатаму има значајна предност во софтверот, пред сè поради платформата „Куда“, која со години се користи како еден од стандардите за развој и тренирање на AI модели.

Затоа Хуавеј се обидува да изгради сопствен екосистем што ги поврзува хардверот и софтверот и би можел да претставува кинеска алтернатива на решенијата на Нвидиа.

Американските ограничувања ја забрзаа трката

Хуавеј има важна улога во напорите на Кина да ја намали зависноста од американската технологија. САД во последните години воведоа ограничувања за пристапот на кинеските компании до најнапредните AI чипови на Нвидиа, како и до дел од технологијата и опремата потребни за производство на напредни полупроводници.

И самиот Хуавеј е под американски трговски ограничувања од 2019 година. Во компанијата велат дека токму поради ваквата состојба Кина мора да развива сопствен технолошки синџир и да ја намали зависноста од тоа дали други држави ќе ѝ продаваат напредни чипови.

Пекинг сака сопствена AI инфраструктура

Развојот на инфраструктурата за вештачка интелигенција е поставен во центарот на стратегијата на Хуавеј. Компанијата најавува нови генерации процесори и сè поголеми компјутерски системи со кои сака да ги надмине ограничувањата на поединечните чипови и да се приближи до решенијата на Нвидиа.

Но моменталниот проблем е парадоксален: додека Хуавеј се обидува да стане кинеска алтернатива на американската технологија, компанијата признава дека сè уште нема доволно производствен капацитет ни за сопствениот пазар.