Зголемена фреквенција на возила утрово се бележи на дел од граничните премини, особено кон Грција, каде граѓани јавуваат за подолги задржувања на пасошките контроли.

Според информациите од Авто-мото сојузот на Македонија, сообраќајот на државните патишта се одвива непречено, по суви коловози, но интензитетот на сообраќај надвор од градските средини е зголемен.

Зголемена фреквенција на Табановце и Богородица

Од АМСМ информираат дека зголемена фреквенција на возила има на граничниот премин Табановце за влез во државата и на Богородица за излез од Македонија.

Според официјалните информации, времето на чекање на овие премини е од околу 30 минути до еден час.

На останатите гранични премини од македонска страна нема подолги задржувања за влез и излез од државата.

Граѓани јавуваат за подолги чекања кон Грција

Сепак, граѓани на социјалните мрежи тврдат дека утрово се потребни меѓу два и три часа за да се поминат двете пасошки контроли кон Грција на граничните премини Богородица и Дојран.

Поради летната сезона и викендот, се очекува зголемен притисок на патните правци што водат кон граничните премини, особено во утринските часови.

АМСМ со препораки до возачите

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата.

Посебна внимателност се препорачува на патиштата низ котлините, речните долини и клисурите, каде што има можност од појава на одрони. Ова особено се однесува на делниците Катланово – Велес, Маврово – Дебар – Струга, Виница – Берово и Кочани – Делчево.