Истрагата за загадувањето на водоснабдителниот систем во Гостивар добива нова димензија, откако Основното јавно обвинителство ја прошири правната квалификација на случајот. Осомничените, кои веќе се наоѓаат во притвор, ќе одговараат и за тешки дела против животната средина, покрај претходно утврдените сомнежи поврзани со нивното постапување. 

Одлуката следува по досегашните истражни дејствија и прибраните докази поврзани со загадувањето на водата, поради кое илјадници граѓани во Гостивар побараа медицинска помош со симптоми на труење.

Проширувањето на истрагата значи дека обвинителството ќе ја утврдува и евентуалната кривична одговорност за последиците врз животната средина и здравјето на населението, што претставува потешка правна квалификација и носи построги санкции доколку вината биде докажана.

Случајот предизвика силен јавен интерес и отвори прашања за функционирањето на водоснабдителниот систем, контролата на квалитетот на водата и одговорноста на надлежните институции.

Истрагата продолжува, а обвинителството најавува дека по целосното прибирање на доказите ќе донесе одлука за понатамошниот тек на постапката.