Функцијата Google AI Overviews, која користи вештачка интелигенција за да дава кратки одговори во резултатите од пребарување, повторно се најде под критики откако корисници открија необично однесување на системот. Проблемот се јавува кај одредени зборови како „ignore“, „disregard“ и „skip“, кои системот понекогаш ги толкува како директни команди наместо како обични поими за пребарување. Поради тоа, резултатите се менуваат или целосно се прикажуваат неточно.

Корисници на социјалните мрежи пријавиле дека наместо класични дефиниции или линкови, AI системот понекогаш одговара како разговорен бот, со пораки од типот: „Разбирам. Ако ви треба нешто друго, слободно прашајте“.

Во некои случаи, AI одговорите целосно исчезнуваат или оставаат празен простор на врвот на страницата.

Google потврди дека е запознаен со проблемот и дека работи на негово решавање. Од компанијата објаснуваат дека грешката не е безбедносен ризик, туку резултат на тоа како системот интерпретира одредени глаголи и фрази. Според технолошки експерти, AI Overviews понекогаш ги третира зборовите како инструкции (prompt-и), наместо како обични термини за пребарување.

Поради овие проблеми, сè повеќе корисници бараат начин да ја исклучат AI функцијата, но Google сè уште нема едноставна опција за целосно исклучување. Како алтернатива се користат „Web“ филтри и екстензии за прелистувачи. Иако Google ја промовира AI технологијата како иднина на пребарувањето, експертите предупредуваат на ризици како неточни информации, намалена посетеност на веб-страници и проблеми со разбирање на контекстот.