Мет Клифорд, една од клучните фигури во креирањето на британската владина стратегија за вештачка интелигенција, се приклучува на американската технолошка компанија Anthropic, само една година откако ја напушти функцијата советник на британскиот премиер Кир Стармер.
Клифорд, успешен технолошки инвеститор, минатата година беше назначен за советник на Стармер за вештачка интелигенција. На неплатената функција останал само шест месеци, по што поднел оставка од лични причини.
Во Anthropic ќе ја преземе функцијата генерален директор за меѓународни прашања, каде што ќе биде задолжен за односите на компанијата со владите надвор од САД, вклучително и со Велика Британија, Европската Унија, земјите од азиско-пацифичкиот регион и Индија. Anthropic е компанијата зад популарниот четбот Claude, а според проценките нејзината вредност би можела да достигне околу 2 трилиони долари во рамките на подготовките за потенцијално излегување на берза.
Критики за „вртечките врати“
Назначувањето на Клифорд повторно го отвори прашањето за таканаречените „вртечки врати“ – преминот на луѓе од високи јавни функции во приватниот сектор, каде што можат да го користат искуството и контактите стекнати во владата. Том Брејк, извршен директор на организацијата Unlock Democracy, предупреди дека ваквиот премин може да му даде значителна предност на приватниот сектор.
„Пренесувањето на големото знаење стекнато во владата за толку чувствително прашање како што е вештачката интелигенција во приватна компанија, и тоа кратко време по напуштањето на јавната функција, ѝ дава огромна предност на таа компанија“, оцени Брејк.
Слични кариерни премини веќе се случувале во британската политика. Поранешниот вицепремиер Ник Клег во 2018 година премина во Meta, поранешниот премиер Риши Сунак стана советник на Microsoft и Anthropic, додека поранешниот министер за финансии Џорџ Озборн се приклучи на OpenAI.
„Најважните одлуки ќе ги носат владите и компаниите заедно“
Клифорд вели дека неговата нова улога ќе биде насочена кон градење партнерства меѓу Anthropic и владите. Според него, земјите ширум светот сакаат да имаат реално влијание врз начинот на кој се развива и користи вештачката интелигенција.
„Најважните одлуки за вештачката интелигенција ќе ги носат компаниите и владите заедно“, изјавил Клифорд, додавајќи дека неговата задача ќе биде Anthropic да стане „вистински партнер“ во тој процес во Европа, Азија и пошироко.
„Треба да имаме понезависна политика“
Беебан Кидрон, независна членка на Домот на лордовите и критичарка на владината политика за вештачката интелигенција, повика на поголема независност во креирањето на политиките.
„Треба да имаме понезависна политика која во центарот на односите со технолошкиот сектор ќе ги стави интересите на работниците, граѓаните и општеството“, порача Кидрон.
Чи Онвура, лабуристичка претседателка на парламентарниот Комитет за наука, иновации и технологија, оцени дека Клифорд дал значаен придонес во британската политика за вештачката интелигенција. Таа смета дека движењето меѓу јавниот и приватниот сектор треба да биде дозволено, но истовремено предупреди дека е „загрижувачки“ што Клифорд толку брзо по заминувањето од владата своето искуство го пренесува во глобална компанија за вештачка интелигенција.
„Се надевам дека своите вештини и искуство ќе ги искористи во Anthropic за промовирање одговорна вештачка интелигенција, наместо да ѝ наметнува неодговорни практики на британската влада“, рече Онвура.
Ќе остане и на чело на британската агенција Aria
Клифорд ќе ја задржи и функцијата претседател на Aria (Advanced Research and Invention Agency), британска владина агенција која финансира амбициозни научни и технолошки проекти. Од агенцијата соопштија дека ќе се изземат од сите прашања што се однесуваат на Anthropic.
Клифорд претходно соработувал и со владата на Риши Сунак како премиерски претставник на Самитот за безбедност на вештачката интелигенција во 2023 година. Тој учествувал и во создавањето на организацијата која подоцна прераснала во водечкиот светски Институт за безбедност на вештачката интелигенција.
Пред да влезе во владата, Клифорд веќе беше добро познат во британскиот технолошки сектор како коосновач на компанијата за ризичен капитал Entrepreneurs First. Компаниите создадени со нејзина поддршка денес имаат вкупна вредност од повеќе од 20 милијарди долари.
