Ако на секои неколку часа ги затворате сите апликации на телефонот затоа што мислите дека така ќе заштедите батерија или ќе го забрзате уредот, можете да престанете. И „Ајфон“ и „Андроид“ се дизајнирани сами да управуваат со апликациите, меморијата и активностите во заднина.

Многумина имаат навика да го отвораат приказот на неодамна користените апликации и да ги тргаат сите од екранот. Логиката изгледа едноставно: колку помалку апликации се отворени, толку помалку работи телефонот и толку подолго ќе трае батеријата. Но, начинот на кој изгледа менито со последните апликации не значи дека сите тие апликации во тој момент активно работат.

„Епл“ директно наведува дека затворањето на апликациите на „Ајфон“ не го продолжува траењето на батеријата. Апликациите што неодамна сте ги користеле најчесто не трошат значителни ресурси и енергија додека не се активни или додека извршуваат конкретни задачи во заднина.

Сличен е пристапот и кај „Андроид“. „Гугл“ наведува дека корисниците не мора постојано рачно да ги затвораат апликациите, бидејќи оперативниот систем автоматски управува со меморијата и потрошувачката на батеријата.

Телефонот сам одлучува што му треба

Она што најчесто создава забуна е изгледот на менито со неодамна користени апликации. Ако таму гледате десет, дваесет или повеќе апликации, тоа не значи дека сите истовремено работат со полна сила и ја трошат батеријата.

Оперативниот систем одлучува кои апликации може да работат во заднина, колку меморија ќе користат и кога нивната активност треба да биде ограничена.

Кај „Андроид“ постојат механизми што автоматски го ограничуваат работењето на апликациите кои трошат премногу ресурси. За апликациите што долго време не ги користите, системот може дополнително да ограничи одредени активности и нивното работење во заднина.

Затоа, бројот на апликации што ги гледате во менито со последните апликации не е исто што и бројот на апликации што моментално активно работат. Со други зборови, не мора вие постојано да бидете „менаџер“ на меморијата на телефонот. Тоа е една од работите што оперативниот систем веќе ја прави автоматски.

Кога сепак треба да затворите апликација?

Постои една ситуација во која рачното затворање има смисла – кога апликацијата не работи правилно.

Ако се замрзне, не реагира на допири, постојано се блокира или очигледно престане да функционира нормално, тогаш затворањето и повторното отворање може да помогне.

Но, ако апликацијата функционира нормално, нема потреба постојано да ја „чистите“ од менито со неодамнешни апликации само затоа што сакате да заштедите батерија. Телефонот веќе е направен да управува со тоа наместо вас.