Германија денес се приклучи на малата група на земји и законодавства кои имаат легализиран канабис за лична употреба, откако во Бундестагот беше изгласан законот со кои се овозможува индивидуите и доброволните групи да одгледуваат и поседуваат одредени количини канабис, објави Ројтерс.
Законот поддржан од владејачката коалиција формирана од Зелените, Социјалдемократската партија и Либералите, како што објави Форбс, минатата недела постигна договор за легализација на канабисот, откако претходно имаа несогласувања за предложениот закон.
Со изгласаниот закон се легализира одгледување до три стебла за приватна употреба и поседување до 25 грама канабис.
Производството на канабис во поголем обем, но сепак некомерцијално ќе биде дозволено за членовите на таканаречените канабис клубови со не повеќе од 500 членови, од кои сите мора да бидат возрасни. Само членовите на клубот можат да го консумираат нивниот производ.
„Имаме две цели: да го запреме црниот пазар и да ја подобриме заштитата на децата и младите“, рече министерот за здравство Карл Лаутербах на почетокот на бурната дебата каде опозицијата го обвини дека промовира употреба на дрога.
„Вие тврдите со сета сериозност дека со легализирање на повеќе дроги ќе ја контролираме употребата на дрога кај младите“, рече пратеникот на демохристијаните Тино Сорге.
„Тоа е најглупавата работа што сум ја слушнал.“
Но, Лаутербах рече дека не треба да се заринуваат главите во песок, бидејќи не само што употребата на канабис е зголемена кај младите луѓе, чиј мозок во развој е особено загрозен, туку и дрогата на улиците е и посилна и понечиста во денешно време, што значително ја зголемува нивната штета.
Се проценува дека околу 4,5 милиони Германци користат канабис.
Германија станува деветтата земја што ја легализира рекреативната употреба на дрогата, која е исто така легална во некои поднационални јурисдикции во САД и Австралија.
Многу повеќе земји ја дозволуваат неговата медицинска употреба како лекови против болки. Канабисот останува нелегален за малолетниците, како и консумирањето во близина на училишта и игралишта.
Некои законодавци се сомневаа дали новите регулативи ќе имаат големо влијание врз справувањето, бидејќи оние кои не се подготвени да одгледуваат сопствен канабис или да се приклучат на клуб за канабис можеби сè уште претпочитаат да ја купат дрогата од црниот пазар.
