Сè повеќе млади Германци на возраст од 20 до 24 години остануваат надвор од образованието и пазарот на труд, иако земјата е под европскиот просек.

Речиси секој десетти млад човек на возраст од 20 до 24 години во Германија ниту работи ниту се школува. Според податоците на германската Федерална служба за статистика, уделот на оваа група пораснал од 8,8 отсто во 2022 година на 10 отсто.

Причините се различни. Дел од младите активно бараат работа, други чекаат почеток на студии или стручна обука, додека значителен дел се економски неактивни. Меѓу причините се обврските за грижа за блиски, здравствени ограничувања и чекање на место за образование или професионална обука.

Експертите предупредуваат дека трендот може да има долгорочни последици и за младите и за германскиот пазар на труд. Недостигот од квалификувана работна сила може дополнително да се зголеми, додека младите кои остануваат надвор од образованието и вработувањето се соочуваат со понеизвесна професионална иднина.

Сепак, Германија и понатаму е под просекот на Европската Унија, кој изнесува 12,9 отсто. Најнизок удел има Холандија со 5,6 отсто, а највисок Романија со 22,8 отсто. Во Бугарија уделот изнесува 17,3 отсто, а во Франција 16,2 отсто.

Според германскиот Институт за економски и социјални истражувања, потребни се подобри можности за стручно образование и поголема поддршка за младите полесно да преминат од образование во светот на работата.