Македонската фризерка Светлана Зуламоска Гроздановска предизвика реакции на социјалните мрежи откако објави видео во кое од шишана коса го изработува ликот на Марко Перковиќ Томпсон. Нејзината необична техника во салонот брзо стана вирална во регионот, но изборот токму на хрватскиот изведувач, познат по националистичкиот репертоар и усташката иконографија, внесе политичка тежина во приказната.
Зуламоска Гроздановска наместо да ги фрла остатоците по шишањето на муштериите, ги користи како материјал за изработка на ликови од јавната сцена. Нејзината последна објава, на која од собрани влакна го обликува ликот на Томпсон, за кус период собра над 73 илјади прегледи и се прошири низ регионалните медиуми.
Фигурата на Марко Перковиќ со децении е магнет за поделби и остри осуди. Хрватскиот музичар во континуитет се соочува со забрани за настапи низ европски земји како Германија, Австрија, Швајцарија и Словенија поради промоција на фашистичка и усташка симболика, како и упорното користење на поздравот „За дом – спремни“. Додека десничарските кругови го слават, антифашистичките организации го посочуваат како главен релативизатор на злосторствата од Втората светска војна и поттикнувач на шовинизам.
Во самите видеа авторката се концентрира на прецизноста и трпението при создавањето на портретот. Сепак, коментарите на мрежите брзо се поделија на оние што ја фалат необичната вештина и оние што критикуваат дека промоцијата на ликови со радикални националистички наративи остава горчлив впечаток, без оглед на занаетчиската оригиналност.
