Франција достави ревидиран законски предлог до Европската комисија со кој бара правна основа за целосна забрана за пристап до социјалните мрежи за лица под 15 години. Потегот доаѓа по одлуката на францускиот Уставен совет, кој го оцени претходниот обид како прекумерно ограничување на основните права, па владата во Париз сега преку Брисел бара усогласување со дигиталната регулатива на Европската унија.

Првичниот француски закон наметнуваше задолжителна родителска согласност и строг систем за дигитална проверка на возраста кај платформите како TikTok, Instagram и Snapchat. Францускиот Уставен совет ја урна таа одредба со образложение дека таквата контрола задира во слободата на комуникација и правото на приватност.

Судиите укажаа и на ризикот од масовно собирање лични податоци преку системите за верификација на возраст. По таа пресуда, француските власти мораа да го преработат целиот законски механизам за да не се судри со европскиот Акт за дигитални услуги (DSA).

Со поднесувањето на новиот текст до Европската комисија, Париз влегува во официјална процедура на нотификација. Целта е Брисел да оцени дали француските мерки претставуваат неоправдана бариера за единствениот дигитален пазар или, пак, се легитимна заштита на менталното здравје на малолетниците.

Францускиот претседател Емануел Макрон со месеци инсистира дека дигиталната заштита мора да добие строга законска рамка. Сепак, доколку Европската комисија оцени дека нацртот ја прекршува правната рамка на Унијата, Франција повторно ќе се соочи со правен ќорсокак.

Евентуалниот европски преседан околу францускиот закон би значел обврска за построга контрола на ниво на цел континент. Тоа директно би влијаело и врз алгоритмите што секојдневно ги користат стотици илјади млади во регионот.