Трговскиот договор меѓу Европска унија и јужноамериканскиот блок МЕРКОСУР стапи во привремена примена, иако пред Судот на правдата на ЕУ сè уште се води постапка за неговата законитост. Одлуката доаѓа по повеќе од две децении преговори и отвора нова фаза во економските односи меѓу Европа и Јужна Америка.
Со договорот се воспоставува зона на слободна трговија за повеќе од 700 милиони луѓе, со укинување на царини за голем дел од стоките и олеснет пристап до пазари. Европската комисија тврди дека ова ќе донесе придобивки за компании, потрошувачи и дел од земјоделскиот сектор.
Политички поделби и отпор
Иако Брисел го промовира договорот како економска шанса, во ЕУ постојат силни поделби. Франција и дел од земјоделските здруженија предупредуваат на ризик од нелојална конкуренција и слабеење на еколошките стандарди. Во неколку земји веќе се одржани протести против договорот.
Европскиот парламент побара оцена од Судот на правдата на ЕУ, кој може да ја запре или поништи примената на договорот. И покрај тоа, Европската комисија одлучи да го активира привремено, што дополнително ја зголемува политичката тензија во Унијата
Трговскиот договор меѓу Европска унија и МЕРКОСУР станува едно од најспорните економско-политички прашања во Брисел, каде што се судираат интересите на трговската експанзија, правната процедура и домашните економски притисоци.
