Европски парламент усвои позиција за преговори со земјите-членки на Европска Унија за новиот повеќегодишен буџет за периодот 2028–2034 година, предлагајќи тој да биде значително поголем од предлогот на Европска комисија. Според европратениците, буџетот треба да достигне околу 2,01 трилиони евра, што е за околу 10 проценти повеќе од претходно предложеното ниво, со цел поефикасно финансирање на стратешките приоритети на Унијата.
Во усвоениот став се нагласува дека буџетот мора да остане клучен инвестициски инструмент кој ќе ги поддржува граѓаните, регионите, бизнисите и малите и средни претпријатија, но и да обезбеди посилна поддршка за надворешните политики. Посебен акцент се става на зголемување на средствата за проширување, развојна помош и поддршка на Украина, при што пратениците оценуваат дека досегашните предлози не се доволни.
Европратениците истовремено го поздравија планот за зголемено финансирање на клучни области како што се конкурентноста, одбраната, иновациите, дигиталната и зелената транзиција, инфраструктурата, здравството, образованието и културата. Дополнително, тие бараат уште поголема поддршка за европските програми како Хоризонт Европа и Еразмус плус, кои се сметаат за двигатели на научниот и образовниот развој.
Пратениците потенцираат и дека регионалните и локалните власти треба активно да бидат вклучени во планирањето и спроведувањето на буџетските програми, со цел поефикасно користење на средствата. Воедно, тие повикуваат на зголемување на средствата за мултилатерална соработка и хуманитарна помош, оценувајќи дека ЕУ мора да има посилна улога и на глобалната сцена.
Преговорите со земјите-членки се очекува да продолжат во наредниот период, а конечниот договор за буџетот ќе ја дефинира финансиската рамка и приоритетите на Унијата за следната деценија.
