По долги месеци на дипломатски застој, Европската унија конечно го одблокира заемот од 90 милијарди евра наменет за Украина. Амбасадорите на ЕУ на состанок во Брисел дадоа прелиминарно одобрение за финансирањето, а со тоа и за 20-тиот пакет санкции против Русија. Клучниот пресврт се случи откако Украина потврди дека го поправила нафтоводот „Дружба” и го обновила пумпањето руска нафта кон Унгарија и Словачка.
Главната пречка во целиот процес беше унгарскиот премиер Виктор Орбан, кој во февруари стави вето на исплатата по украинските тврдења дека руски напад ги оневозможил испораките. Орбан инсистирал нафтата повторно да потече пред да може да се исплати кредитот, а Украина потврдила дека поправките се завршени во вторникот. Со унгарските избори овој месец, кои Орбан ги загуби, исчезна и последната политичка пречка за одобрување на заемот.
Украинскиот вицепремиер Тарас Качка го опиша финансирањето од ЕУ како прашање на живот или смрт за Киев. Две третини од средствата, односно 60 милијарди евра, ќе бидат наменети за зајакнување на одбранбените потреби и набавка на воена опрема. Остатокот ќе биде искористен за пошироката финансиска и буџетска стабилизација на земјата.
Шефицата за надворешна политика на ЕУ, Каја Калас, истакна дека Украина навистина има потреба од овој заем и дека тој е знак дека Русија не може да ја надживее Украина. Претседателот Зеленски пак изјави дека повеќе нема основа за блокирање на средствата, нагласувајќи дека ЕУ побарала поправка на нафтоводот и дека Украина ја исполнила таа обврска. Словачката министерка за економија потврди дека суровата нафта ќе почне да тече во четврток, за прв пат од 27 јануари.
Иако одобрението е дадено, според украинските медиуми сепак може да поминат уште неколку недели пред средствата да пристигнат во Киев. Заемот е договорен уште во декември 2025 година и покрива две третини од проценетите финансиски потреби на Украина за периодот 2026 и 2027 година. Чешка, Унгарија и Словачка се оградија од поддршката, па договорот бил склучен преку механизмот за засилена соработка меѓу земјите членки кои сакаат да учествуваат.
