Потрошувачите во Македонија наесен би можеле да се соочат со нов бран поскапувања на храната, додека климатските промени, геополитичките тензии и повисоките трошоци за производство создаваат дополнителен притисок врз земјоделството и синџирите на снабдување.

Сушите и високите температури веќе влијаат врз земјоделските приноси во различни делови од светот. Дополнителен ризик претставуваат нарушувањата во трговијата со житарици, додека поскапото гориво и ѓубривата ги зголемуваат трошоците за производство, преработка и транспорт.

Последиците може да се почувствуваат и кај нас. Иако домашното производство на пченица обезбедува одредена стабилност, македонското земјоделство и прехранбената индустрија во голема мера зависат од увоз на гориво, ѓубрива, суровини и други репроматеријали.

Овошјето и зеленчукот први би можеле да поскапат

Првите промени во цените би можеле да се почувствуваат уште во текот на есента, особено кај свежото овошје и зеленчукот, каде влијанието на временските услови врз приносите е директно.

Кај лебот, тестенините и другите преработени производи, евентуалното зголемување на трошоците би можело да се почувствува со одредено задоцнување. Причина за тоа се постојните залихи, договорите и времето потребно повисоките трошоци да се пренесат низ производниот и трговскиот синџир.

И домашните производители под притисок

Дополнителен проблем се домашните услови. Производителите на црвена индустриска пиперка од струмичкиот регион повторно реагираат на откупната цена. Само неколку дена по постигнатиот договор со посредство на Министерството за земјоделство, откупната цена повторно се движи меѓу 20 и 25 денари за килограм.

Поради тоа, производителите најавија протест, барајќи решение за откупот и подобри услови за предавање на реколтата.

Состојбата покажува дека цената на храната во наредниот период нема да зависи само од светските берзи. Врз крајната цена ќе влијаат и домашното производство, приносите, трошоците на земјоделците, увозните репроматеријали и начинот на кој поскапувањата ќе се пренесуваат низ целиот синџир до потрошувачите.