Сицилијанското гратче Флоридија, каде во август 2021 година беа измерени рекордни 48,8 степени Целзиусови, денес живее под постојана блокада предизвикана од екстремни температури. Жителите велат дека жештината повеќе не се мери само со соборени рекорди, туку со директното влијание врз секојдневието. Улиците се празни во поголемиот дел од денот, а земјоделството и егзистенцијата на локалното население се под сериозен притисок.
Главниот плоштад „Дел Пополо“ во Флоридија, гратче со околу 20.000 жители во близина на Сиракуза, вообичаено исполнет со луѓе и кафулиња, сега останува пуст речиси целиот ден. Високите температури не попуштаат ниту во вечерните часови, со што целосно се попречува локалната традиција семејствата да изнесуваат столчиња пред куќите на свеж воздух и разговор.
Советничката за култура во Флоридија, Серена Спада, за Ројтерс изјави дека ситуацијата наликува на нов вид изолација. Таа наведе дека дури и семејствата со мали деца се принудени да останат затворени, бидејќи условите во парковите се непријателски сè до доцните попладневни часови.
Рекордот од 48,8 степени, што Светската метеоролошка организација во 2024 година официјално го потврди како највисока температура измерена во континентална Европа, беше регистриран на 11 август 2021 година во руралниот округ Монастери. Климатолозите укажуваат дека од поединечните температурни скокови многу позагрижувачки е постојаниот раст на просечните вредности.
Податоците на климатскиот мониторинг на Ројтерс покажуваат дека на 12 август годинава во Флоридија беа измерени 33,3 степени, што е за 4,1 степен над историскиот просек за периодот 1961–1990 година. Директорот на сицилијанската Агрометеоролошка информативна служба (СИАС), Луиџи Пасоти, објасни дека опасноста повеќе не доаѓа од еднодневни или дводневни температурни пикови, туку од цели недели и месеци со континуирана жештина и исклучително голем број тропски и супертропски ноќи.
Екстремните временски прилики земаат голем замав врз земјоделството како главен економски столб на Сицилија. Во 2021 година во областа на Флоридија беа уништени над 3.000 пчелни сандаци, што предизвика пад на производството на мед за 80 проценти.
Агрономот Франческо Беломи нагласува дека намалувањето на популацијата на пчели и опрашувачите води кон пад на биолошката разновидност и послаб квалитет на земјоделските приноси. Локалните пчелари предупредуваат дека високите температури предизвикуваат колапс на поединечни пчелни колонии и губење на цели пчеларници.
