Екстремните горештини ги туркаат глобалните земјоделско-прехранбени системи на работ на пропаст и ја загрозуваат егзистенцијата и здравјето на повеќе од една милијарда луѓе, се наведува во нов извештај на Организацијата на ОН за храна и земјоделство (ФАО) и Светската метеоролошка организација (СМО).
Организациите соопштија дека топлотните бранови стануваат сè почести, поинтензивни и подолготрајни, што им штети на земјоделските култури, добитокот, рибарството и шумите.
„Екстремните горештини го менуваат сценариото за тоа што и кога земјоделците, рибарите и шумарите можат да одгледуваат. Во некои случаи дури диктираат дали воопшто ќе можат да работат“, изјави Кавех Захеди, раководител на канцеларијата на ФАО за климатски промени.
Тој додаде дека „во суштина, овој извештај покажува дека се соочуваме со многу неизвесна иднина“.
Неодамнешните климатски податоци покажуваат дека глобалното затоплување се забрзува, а минатата година била меѓу трите најтопли во историјата, што предизвикува почести и посилни временски непогоди.
Екстремните горештини ги засилуваат сушите, шумските пожари и појавата на штетници, а во исто време нагло ги намалуваат приносите на земјоделските култури кога ќе се надминат клучните температурни прагови.
Во извештајот се наведува дека повисоката температура ја намалува безбедносната маргина на која се потпираат растенијата, животните и луѓето за да функционираат.
Приносите на повеќето главни култури опаѓаат кога температурата ќе надмине околу 30 степени Целзиусови.
