Научните истражувања покажуваат дека карактерот на детето не зависи од тоа дали има браќа и сестри, туку од семејната средина, воспитувањето и условите во кои расте.

Стереотипите дека единците се разгалени, себични или осамени сè уште се присутни, но современите психолошки истражувања не ги потврдуваат овие тврдења. Според експертите, бројот на деца во семејството не ја одредува личноста на детето.

Психолозите истакнуваат дека развојот на детето многу повеќе зависи од квалитетот на родителската грижа, темпераментот и социоекономската средина. Единците генерално се психички здрави, добро социјализирани и успешно се прилагодуваат на различни животни ситуации.

Истражувањата покажуваат дека децата кои растат без браќа и сестри често полесно комуницираат со возрасни, побрзо развиваат самостојност и понекогаш повеќе преферираат блиски пријателства отколку големи друштва. Тоа, сепак, не значи дека се емоционално поразлични од своите врсници.

Студија објавена во научното списание Nature Human Behaviour не пронашла докази дека единците имаат психолошки недостатоци. Напротив, кај дел од нив се забележани подобри когнитивни способности и поголема ментална отпорност, што експертите го поврзуваат со поголемото родителско внимание.

Од друга страна, стручњаците предупредуваат дека единците понекогаш можат да се соочат со поголем притисок од родителските очекувања или потешко да се приспособуваат во односи кои бараат постојан компромис. Сепак, заклучокот е јасен – тоа што детето е единец не ја одредува неговата личност, туку е само една од многуте околности што влијаат врз неговото растење и развој.