Американската корпорација Мајкрософт понуди отпремнини за доброволно напуштање на работните места за околу 60.000 вработени во САД, Канада, Велика Британија и Индија. Понудата ги зафаќа клучните сектори за развој на вештачка интелигенција, финансии, човечки ресурси, Икс-бокс (Xbox) и оперативниот систем Виндоус. Иако компанијата остварува историски висока добивка, редукцијата на тимовите отвора страв меѓу вработените дека алгоритмите за автоматско програмирање забрзано ја преземаат инженерската работа.
Официјалната програма за доброволен излез, објавена на корпоративниот блог на Мајкрософт, опфаќа илјадници вработени на четири главни светски пазари. Мерката директно ги таргетира вработените ангажирани на развој на вештачка интелигенција и алатката Копајлот (Copilot), како и тимовите задолжени за Виндоус и гејминг одделот Икс-бокс. Според извештаите на новинската агенција Ројтерс, од овие кратења се изземени само одделите за маркетинг, комерцијална продажба и компјутерска безбедност.
Мерката отвора директна несигурност кај технолошките работници. Програмерите што со години ги градеа новите алгоритми сега први се соочуваат со можноста нивните задачи да бидат заменети со автоматизирани софтверски процеси.
Финансиските показатели на Мајкрософт покажуваат постојан раст на приходите и капиталните резерви, што претставува остар пресврт од вообичаената пазарна логика. Претходните бранови на технолошки отпуштања беа одговор на пад на приходите или глобална рецесија. Овојпат преструктурирањето се случува во услови на висока профитабилност, испраќајќи порака дека технолошкиот сектор влегува во модел каде зголемениот капитал не бара отворање нови работни позиции. Наместо тоа, корпорациите ја насочуваат заработката кон дата-центри и процесорска моќ.
