Екстремно ниското ниво на водата на Дунав деновиве драматично го промени изгледот на реката кај Нови Сад, откривајќи делови од коритото што со години биле под вода.

Бреговите се проширија, а бројни бродови и помали пловила останаа насукани на суво, создавајќи необични сцени што граѓаните ги опишуваат како ретко видени.

Видеата што кружат на социјалните мрежи ја покажуваат сериозноста на состојбата – делови од реката наликуваат на плитки бари, додека други потсетуваат на пустински пејзажи.

Во регионот на Опатовац, од коритото на Дунав исплива и брод стар речиси 90 години, што дополнително ја илустрира големината на сушата.

Последиците веќе се чувствуваат и пошироко. Поради неповолната хидролошка состојба, во делови од системот Дунав-Тиса-Дунав е привремено прекинато наводнувањето.

Надлежните предупредуваат дека, доколку сушата продолжи, нивото на водата може дополнително да опадне, што би создало проблеми во речниот сообраќај, земјоделството и управувањето со водните ресурси.

Дунав деновиве јасно предупредува колку климатските промени и долгите сушни периоди можат да го променат ликот на една од најголемите европски реки.