Вечерва во Прилеп ќе настапат Драган и Ратко Даутовски, на концерт што ќе се одржи од 20 часот на летната сцена на Центарот за култура „Марко Цепенков“. Влезот за публиката е слободен. Концертот е поддржан од Министерството за култура и туризам.

Драган Даутовски – четири децении посветени на македонскиот фолклор

Проф. д-р Драган Даутовски е роден во 1957 година во село Русиново. Основното образование го завршил во Берово, а средното музичко образование во Штип. Дипломирал на Факултетот за музичка уметност во Скопје, на отсекот за музичка теорија и педагогија.

За време на студиите развил силен интерес за македонскиот музички фолклор, а по дипломирањето започнал да работи како професор по музичка култура. Неговата посветеност на фолклорот довела до создавањето на детското фолклорно студио „Детелинки“, кое во еден период дејствувало и во рамките на ансамблот „Танец“.

Во 1992 година го основал ансамблот на народни инструменти „Миле Коларовски“, со кој настапувал на бројни фестивали и манифестации во земјата и странство. Неговата работа со ансамблот и поширокиот ангажман во областа на фолклорот придонеле за обновувањето на интересот за изворната македонска музика.

Даутовски е автор и учесник во голем број музички проекти. Учествувал во создавањето на музиката за филмот „Пред дождот“, а меѓу неговите позначајни авторски проекти е „DDSynthesis“. Компонирал музика за театарски претстави, меѓу кои „Македонска приказна“, „Јонадаб“, „Писание“ и „Зверињак“, како и музика за кореографски постановки на „Танец“, меѓу кои „Џамала“ и „Старо тешко“. Автор е и на музиката за филмот „Ноќ спроти Василица“.

Неговиот творечки опус опфаќа повеќе од 600 композиции.

Со својот квартет во изминатата деценија настапувал на фестивалски сцени низ Европа и светот, меѓу кои во Холандија, Русија, Италија, Франција, Португалија, Германија, Полска, Белгија, Грција, Црна Гора, Словенија, Бугарија, Австрија, Куба, Украина, САД и Кина.

Денес Драган Даутовски е редовен професор на Факултетот за музичка уметност во Скопје.

Ратко Даутовски – перкусионист со препознатлив музички израз

Ратко Даутовски, роден во 1981 година во Скопје, е еден од активните македонски перкусионисти, препознатлив по својот музички израз, богат репертоар и изведувачка техника. Од најрана возраст го истражува богатото мелоритмичко наследство на македонската традиционална музика, но и ритмите карактеристични за различни музички традиции во светот.

Дипломирал на Факултетот за музичка уметност во Скопје, на отсекот за традиционални инструменти и музичка теорија и педагогија. Покрај формалното образование, континуирано се усовршувал и со својот татко, Драган Даутовски.

Од 1999 година е член на Драган Даутовски квартет, со кој настапувал на голем број меѓународни сцени и фестивали во Европа, Азија, Австралија и други делови од светот. Нивниот прилепски концерт ќе биде можност публиката повторно да го слушне препознатливиот спој на македонската традиционална музика, современиот музички израз и виртуозната перкусионистичка изведба.

Концертот почнува во 20 часот, а влезот е слободен.