Договорот меѓу САД и Иран за намалување на тензиите и запирање на конфликтот, според анализи, сериозно го поткопува политичкиот капитал на израелскиот премиер Бенјамин Нетанјаху. Нетанјаху со децении го градел својот имиџ како лидер кој може да ја насочи американската политика кон Иран во согласност со интересите на Израел, позиционирајќи се како клучна фигура во односите меѓу Вашингтон и Тел Авив.

Според анализа на агенцијата Ројтерс, со повикување на дипломати и поранешни американски функционери, новиот американско-ирански договор претставува пресврт кој ја менува таа перцепција. Додека претходно се сметало дека Нетанјаху има значително влијание врз Белата куќа, сега се наведува дека американската администрација, предводена од Доналд Трамп, сè повеќе ги носи одлуките независно од израелските приговори.

Поранешни американски функционери предупредуваат дека израелскиот премиер се соочува со растечки внатрешни и надворешни притисоци, од една страна очекувањата на домашната јавност, а од друга страна американската политика која се обидува да избегне нови конфликти на Блискиот Исток. Во анализата се истакнува дека Нетанјаху е ставен во тешка позиција: ако продолжи со воен притисок, ризикува тензии со Вашингтон, а ако се повлече, се соочува со политички отпор дома.

Поранешни советници и аналитичари оценуваат дека новиот договор претставува „одлучувачки удар“ за неговата долгорочна стратегија кон Иран, бидејќи не се остварени клучните цели, слабеење на иранското раководство и зајакнување на израелската безбедност преку регионална доминација. Исто така, се наведува дека позицијата на Иран во регионот останува стабилна, додека напорите за проширување на дипломатските договори меѓу Израел и арапските држави се забавуваат.

Според анализата, ова значи дека Нетанјаху се соочува со значајно ослабување на својата политичка стратегија и влијание во односите со САД, кои сè повеќе водат сопствена дипломатска линија на Блискиот Исток.