Музејот на современата уметност во Скопје вчера беше претворен во голема средба на винил-културата. Јубилејното, десетто издание на Скопје Винил Конвенција ги собра на едно место колекционерите, продавачите на плочи, диџеите и љубителите на аналогниот звук, во програма што трае повеќе од 12 часа и се одвива на три сцени.
Скопје Винил Конвенција оваа година одбележува десет години од своето постоење. Настанот беше замислен како место каде што винилот не е само предмет за колекционирање, туку повод за средба, размена, слушање музика и создавање заедница околу форматот кој, и покрај дигиталната ера, повторно добива сè поголемо внимание.
Овогодишната програма донесе 36 локални, регионални и интернационални диџеи распоредени на три сцени. Меѓу гостите се Walla P од Канада, Femdelic од Германија, Dirty Hairy од Велика Британија, Woo-D од Словенија, Iron и Ceka од Србија и Zogai од Косово. Од домашната сцена настапуваат, меѓу другите, DJ Goce, Chvare, Double G, Diah, Sasho Uzun, Daphunk, Rade, Vaso, Darko Stepic, Bojan Chakra, Alek Soltirov, Flooder, Soul Case, Uzun Baba, DJ Slave, Vlashki и Mongo & Omaru.
Но музиката е само еден дел од конвенцијата.
Во рамки на винил-базарот учествуваа повеќе од 20 продавачи и колекционери од Скопје, Куманово, Прилеп, Белград, Ниш, Подгорица, Солун и Пловдив. Посетителите имаат можност да купуваат, продаваат и разменуваат грамофонски плочи, а меѓу учесниците се Qrecords, ЧувДеЧув, Apoteka, Discom, Vintage Shop, Montenegro Records, Pavlos Wax и My Vinyl Store.
Покрај винил-базарот, програмата вклучуваше и поп-ап содржини, second hand продавници, гастрономска понуда и простор наменет за најмладите посетители. Меѓу поп-ап учесниците се Маалски Бувљак by Kombo, Panooramixx, 5 до 12, Mate Bike, Another Universe Manufaktur, Kalin Ceramics, Niz Jewelry и Andrej Bartling Studio, додека детскиот агол е организиран во соработка со Едукативниот центар Жабец.
За храната и пијалаците беа задолжени Jojo’s BBQ, Mustacos, Toto Daily Bistro, Kasha Bar, Bistro Komedija и L’Angolo Di Caffe.
Од првата конвенција до регионална винил-средба
Зад конвенцијата стојат DJ Goce и DJ Chvare, кои во 2017 година ја организираа првата Скопје Винил Конвенција. Настанот низ годините прерасна во едно од позначајните собиралишта за винил-културата во регионот. Интересот за конвенцијата во меѓувреме го надмина локалниот контекст. Во изминатите изданија на неа настапувале имиња како DJ Koco, Diamond D, Easy Mo Bee, Robert Smith, Natasha Diggs, Fonki Cheff, DJ Woody, Marc Hype, Naughty NMX и Boca 45.
Самата биографија на DJ Goce потсетува и дека конвенцијата е дел од поширока сцена околу винилот и диџеј-културата. Заедно со Chvare го основал Funky Fresh и е еден од основачите на Skopje Vinyl Convention, а во своите сетови комбинира хип-хоп, соул, фанк, диско, џез, реге и други жанрови, вклучително и сетови исклучиво со винили и 7-инчни плочи.
Десеттото издание на Скопје Винил Конвенција така продолжува една приказна која започна како собирање на љубители на плочи, а вчера функционираше како поширока културна средба и место каде што различни генерации доаѓаат поради музиката, но остануваат поради заедницата, колекционерската страст и аналогното искуство.
