Кога се избира дестинација за патување, времето често знае да биде подеднакво важно како храната, атракциите и атмосферата. А кога станува збор за дождот, Европа има свои јасни шампиони. Според достапните бази на податоци за просечни годишни врнежи, меѓу најврнежливите земји на континентот се Исланд, Швајцарија, Црна Гора и Норвешка, додека меѓу посувите се Молдавија, Унгарија и Кипар.
Особено интересно е што Црна Гора редовно се појавува високо на европските листи. Причината е комбинацијата од Јадранското Море и планинскиот релјеф, особено масивот Орјен, кој ја задржува влажната воздушна маса и создава исклучително обилни врнежи. Токму затоа местото Црквице често се наведува како едно од најврнежливите населени места во Европа, со просек од над 4.600 милиметри годишно.
Ова е и причината зошто стереотипот дека Велика Британија е „најврнежлива“ во Европа не е баш точен. Таа иако навистина има репутација на дождлива земја, според споредбените податоци не е ниту блиску до европските екстреми и повеќе се движи околу континенталниот просек отколку околу самиот врв.
На глобално ниво, највисоките просечни врнежи ги бележат земји во тропски појас, додека најсувите се во северна Африка и на Арапскиот Полуостров. Светската банка ја дефинира оваа мерка како долгорочен просек на годишни врнежи на ниво на цела држава, што значи дека бројките не секогаш го опфаќаат локалниот екстрем, туку националниот просек.
Затоа и ваквите листи треба да се читаат внимателно: една земја може да нема многу врнежи на национално ниво, а сепак да има градови или региони што се меѓу најдождливите во Европа. Но ако се гледа целата слика, Црна Гора навистина останува меѓу највлажните европски земји, што за многумина од регионот можеби и не е толку изненадувачки.
